1-Хомустаах “Сайдыы” эбии үөрэхтээһин киинигэр үтүө үгэскэ кубулуйбут Андрей Ушницкай кэриэһигэр сахалыы остуол оонньууларыгар түргэн хабыылаах хабылык, хаамыска күрэхтэһиитэ буолара күүтүллэр.
Андрей Ушницкай аата Нам улууһун бастыҥ хабылыксыттарын төрүт сахалыы остуол оонньууларыгар интэриэһэргэппит, угуйбут уһуйааччынан ааттанар. Кини үөрэппит оҕолоруттан ситиһиилээҕинэн Рената Тимофеева-Захарованы ааттыахха сөп.
“Андрей Ушницкай кэриэһигэр ананар хабылык, хаамыска турнирыгар оскуола үөрэнээччилэрин күүтэбит.
Быйыл киэн туттар бастыҥ педагог киһибит Андрей Петрович төрөөбүтэ 65 сыла. Андрей Петрович Нам улуугар хабылык көрүҥэ баар буоларыгар, сайдарыгар тус кылаатын киллэрбит тренербит.
Быйылгы турнир кыттыылаахтара хабылыкка 5-тээх, 7-лээх хаамыска, умсаах, күөрэгэй, сулус түһүмэхтэригэр оонньуохтара”, – диир Нам улууһун хабылыкка федерациятын толорооччу дириэктэрэ, энтузиаст Маргарита Охлопкова.
Оскуолалар бу көрүҥҥэ ылса иликтэрэ бэлиэтэнэр эбит. Холобура, төрүт көрүҥнэргэ аан маҥнайгытын ыытыллыбыт фестивалга оскуола барыта кыттыыны ылбатаҕын аһаҕастык этэбин. Дьиҥэ, улуус таһымнаах буолла да, оскуола бары үөрэнээччитэ кыттыыны ылара ситиһиллиэхтээх.