Норуоттар икки ардыларынааҕы “Азия оҕолоро” оонньууга Саха сирин хамаандата стендовай ытыыны 8 мэтээллээх түмүктээтэ. Ол курдук, күрэхтэһээччи оҕолор 3 кыһыл көмүс, 2 үрүҥ көмүс уонна 2 боруонса мэтээллэри ылары ситистилэр.
Стендовай ытыыга Саха сирин сүүмэрдэммит хамаандаларыттан кыттыыны ылбыт Ньургун Тимофеев аатынан өрөспүүбүлүкэтээҕи Олимпийскай эрэл спорт оскуолатын иитиллээччилэрэ, Аркадий Аркадьевич, Алексей Аркадьевич Андреевтар ытыыга угуйар оҕолоро олус табыллан ыттылар.
Скит түһүмэххэ Петров Арылхан (Саха сирин сүүмэрдэммит 1-кы хамаандата) кыһыл көмүс; Константинов Саян (Саха сирин сүүмэрдэммит 2-с хамаандата) үрүҥ көмүс; Седельникова Амилия (Саха сирин сүүмэрдэммит 2-с хамаандата) үрүҥ көмүс; Петрова Галина (Саха сирин сүүмэрдэммит 1-кы хамаандата) боруонса мэтээллэри ситистилэр.
Трап түһүмэҕэр Кириллина Айна (Саха сирин сүүмэрдэммит 1-кы хамаандата) кыһыл көмүс; Владимирова Святослава (Саха сирин сүүмэрдэммит 2-с хамаандата) боруонса; Копылов Данил (Саха сирин сүүмэрдэммит 1-кы хамаандата) кыһыл көмүс; Петров Айсен (Саха сирин сүүмэрдэммит 2-с хамаандата) үрүҥ көмүс мэтээллэри ыллылар.
Трап түһүмэххэ ытааччы хаһыллыбыт сиртэн (траншея) көтөн тахсар тэриэлкэлэри табыахтаах. Эбэн эттэххэ, тэриэлкэ хайа баҕарар хайысхаҕа туһаайан көтөр эбит. Оттон скит көрүҥэр ытааччы уҥа уонна хаҥас эҥэртэн салгыҥҥа көтөн тахсар тэриэлкэлэри табыахтаах.
“Трап түһүмэххэ Кириллина Айна утарсааччыларыттан 5 очконан сабырыйтаран иһэн кыайыыга дьулуурун көрдөрдө. Ол курдук, кини кэнники ытыытыгар биири да сыыспакка очкотун тэҥнээн баран, Урал спортсменын кытта хардарыта ытыалаһыыга кыайда”, – диир Олимпийскай эрэл спорт оскуолатын методиһа Кирилл Александров.
Харысхан Попов