“Өлүөнэ очуостара” айылҕа пааркатыгар норуоттар икки ардыларынааҕы VIII “Азия оҕолоро” оонньуу уотун уматыы сиэригэр-туомугар кулун тутар 19 күнүгэр Намтан 23 киһилээх делегация айаннаата.
“Азия оҕолоро” оонньуулар саҕаланаллара 100 күн хаалла. Бу күнтэн саҕалаан уот эстафетата бэс ыйын 26 күнүгэр диэри Саха сирин улуустарынан, куораттарынан айанныаҕа.
Намнааҕы педагогическай колледж 11, Намнааҕы техникум 9 устудьуонун “Движение первых” Бүтүн Россиятааҕы оҕолор уонна ыччаттар хамсааһыннарын олохтоох салаатын председателэ Анна Ядрихинская, Сахаяна Васильева салайыылаах илдьэ бардылар.
Уоту уматыы сиэрин-туомун толоруу кэнниттэн, “Легенды России” уонна “Саха сирин хоккейын ветераннара” табаарыстыы көрсүһүүгэ шайбаны көтүтүөхтэрэ.
“Үрдүк таһымнаах тэрээһиҥҥэ кыттыыны ылыы үрдүк чиэс. Хоккейга Олимпийскай оонньуулар, Аан дойду, Европа чемпионаттарын кыайыылаахтарын күн аайы көрбөккүн – диир Сахаяна Алексеевна.
Харысхан Попов