Хатыҥ Арыыга И.Е. Винокуров аатынан историяны уонна кыраайы үөрэтэр түмэлгэ «Азия оҕолоро» норуоттар икки ардыларынааҕы VIII-с спорт оонньуутун көрсө, Людмила Васильевна Петрова быыстапката турда.
Людмила Васильевна түмэлгэ быыстапка саалатын сэбиэдиссэйинэн үлэлиир. 1978 сылтан саҕалаан коллекционер абылаҥар ылларан, күн бүгүнүгэр диэри малы-салы хомуйан, өрөспүүбүлүкэҕэ биллибит коллекционер буолар. «Азия оҕолоро» оонньуу саҕаланыаҕыттан, оонньуу бэлиэ оҥоһуктарын мунньан, дьонугар-сэргэтигэр көрдөрөр идэлэммит.
Бастакы «Азия оҕолоро» оонньуу Дьокуускайга 1996 сыллаахха өрөспүүбүлүкэбит бастакы президенэ Михаил Ефимович Николаев көҕүлээһининэн уонна быһаччы өйөбүлүнэн атырдьах ыйын 9-16 күннэригэр ыытыллыбыта. Оонньуу түөрт сылга биирдэ ыытыллар. Быйылгы оонньууларга 24 араас тас дойдуттан, Саха сириттэн 2 хамаанда хомуллан кытта сылдьаллар.
Үүнэр-сайдар кэскиллээх Сахабыт сирин ыччатыгар ситиһиилэри баҕарабыт!
Надежда Сивцева