Бүгүн, бэс ыйын 17 күнүгэр, «Азия оҕолоро» VIII норуоттар икки ардыларынааҕы спорт оонньуутун уота эстафета быһыытынан Нам улууһугар кэлэн олохтоохтор, волонтердар, сайыҥҥы лааҕыр оҕолоро уруйдуу-айхаллыы көрүстүлэр. Сарсын Дьокуускай куорат Жатай уокуругун олохтоохторо көрсүөхтэрэ.
Эстафета И.Е. Винокуров аатынан педагогическай колледжтан саҕаланан баран, М.К. Аммосов болуоссатыгар түмүктэннэ. Тэрээһиҥҥэ улуус баһылыга Юрий Слепцов, улуус мунньаҕын председателэ Алексей Винокуров, баһылыгы солбуйааччы Юрий Дьяконов, спорка биллэр-көстөр бэтэрээн уонна ыччат спортсменнар факелы туппутунан киин уулуссанан сүүрдүлэр.
Факел бочуоттаах бастакы уота И.Е. Винокуров аатынан Намнааҕы педколледж тренер-преподавателэ, Дыгын оонньууларын чемпиона Юрий Эверстовтан саҕаланна. Салгыы эстафетаны Саха сирин спортивнай оонньууларын чемпиона Клавдия Шелковникова, Саха сириттэн бастакы Гроссмейстер, ССРС спордун маастара, дуобакка аан дойду чемпионатын боруонса призера Александр Азаров, РФ спордун маастара, саахымакка Уһук Илин федеральнай уокурук чемпиона Виринея Кутукова, бэтэрээннэр ортолоругар көҥүл тустууга аан дойду чемпионатын боруонса призера Александр Румин, волейболга Саха сиригэр оҕолорго аҕа тренерэ Айсен Жерготов, «Нам улууһа» МТ баһылыгын солбуйааччы Юрий Дьяконов, спорт уонна физическэй култуура управлениетын начальнига, Манчаары оонньууларын чемпиона, гиирэ спордун маастара Павел Иванов, Хатырык нэһилиэгин спорт инструктора, Саха сирин чемпиона уонна призера Айаал Алексеев, көҥүл тустууга РФ спордун маастара, хапсаҕайга спорт маастара, өрөспүүбүлүкэ чемпиона, Саха сирин спорт оонньууларын призера, Уһук Илин федеральнай уокурук чемпиона, Россия чемпионатын кыттыылааҕа Василий Винокуров, СӨ көҥүл тустууга аҕа тренерэ, пляжнай тустууга аан дойду чемпиона Вадим Семенов, мас-рестлиҥҥэ аан дойду чемпиона Анатолий Гладков, оҕолор ортолоругар Уһук Илин федеральнай уокурукка чэпчэки атлетика чемпиона, И.Е. Винокуров аатынан Намнааҕы педколледж 3-с курсун студена Ангелина Иванова, чэпчэки атлетикаҕа өрөспүүбүлүкэтээҕи турнирдар чемпиона Сайдам Парников, кикбоксиҥҥа Россия чемпионатын боруонса призера, Арьян Попов уонна эстафета бүтэһик биэтэгэр улуус депутаттарын сэбиэтин председателэ Алексей Винокуров «Нам улууһа» МТ баһылыгар Юрий Слепцовка аҕалан туттарда.
«Азия оҕолоро» VIII норуоттар икки ардыларынааҕы спорт оонньуутун уота Өлүөнэ очуостарыттан саҕыллан, өрөспүүбүлүкэ улуустарынан сылдьан баран, бүгүн биһиги улууспутугар кэллэ. Саха сиригэр «Азия оҕолоро» ыытылларынан сибээстээн, улууспутугар 2024 сылы Оҕо спордун сылынан биллэрбиппит. Бэлиэ сылбыт чэрчитинэн, араас таһымнаах тэрээһиннэр буолаллар.
«Азия оҕолоро» оонньууга биһиги улууспутуттан кыттар оҕолорбутугар үрдүк ситиһиилэри, кыайыыны баҕарабыт. «Азия оҕолоро» норуоттар икки ардыларынааҕы спорт оонньуута Сахабыт сирин, Россияны көрдөрөр, билиһиннэр. Аан дойдутааҕы тэрээһин үрдүк таһымнаахтык аастын, Сахабыт сирин хамаандатыгар кыайыыны!»- диэн «Нам улууһа» МТ баһылыга Юрий Иннокентьевич баҕа санаатын эттэ.
«Азия оҕолоро» норуоттар икки ардыларынааҕы спорт оонньууларын уотун харайааччы Михаил Ким улууспут оҕолоругар, салайааччыларыгар, волонтердарга, спортсменнарга махтал тылын тириэртэ. Итиэннэ улуус баһылыгар өйдөбүнньүк факелы үөрүүлээх быһыыга-майгыга туттарда.
Семен Аргунов