Бүгүн, бэс ыйын 26 күнүгэр, киэһээ 8 ч. «Саха» НКИХ, «Якутия 24», «Матч ТВ», «Мамонт» уонна «Тэтим» араадьыйа оонньууну быһа эфиргэ көрдөрүөҕэ-иһитиннэриэҕэ.
Дьокуускай Н.Н. Тарскай аатынан «Туймаада» стадионугар бүгүн киэһээ оонньуу үөрүүлээхтик аһыллыаҕа. Көрөөччүлэргэ анаан саха академическай, национальнай үҥкүү, «Гулун» аҕыйах ахсааннаах хотугу норуот, «Олоҥхо», Опера уонна балет государственнай, нуучча драматическай, үүнэр көлүөнэ театрдарын, государственнай цирк, филармония артыыстара, саха балетын оскуолатын, музыка үрдүкү оскуолатын үөрэнээччилэрин уонна Дьокуускай, улуустар уус-уран коллективтара кыттыылаах ураты көрдөрүү буолуоҕа.
Маныаха өрөспүүбүлүкэ 24 улууһуттан 68 оҕо уус-уран үҥкүү коллектива, ол иһигэр 11 хоту улуустан кыттыыны ылыахтара. Дьокуускай «Сюрприз», «Маска», «INCIDE», «Бриллианты Якутии», «Геркилэн», «Версия», «DIJIT PROJEKT», «Автобус радости» ансаамбыллар үҥкүүлүөхтэрэ.
Санатан эттэххэ, VIII-с норуоттар икки ардыларынааҕы «Азия оҕолоро» оонньуу бу дьыл бэс ыйын 25-тэн от ыйын 7-гэр диэри Дьокуускайга ыытыллаллар. Күрэхтэһии программатыгар 24 спорт көрүҥэ киирэр. 239 комплект мэтээл оонньонор. Оонньууларга 24 тас дойдуттан уонна Россияттан 5 хамаанда кэлэн кытта сылдьар.
СӨ Ил Дархана Айсен Николаев бэлиэтээбитинэн, бу биһиэхэ ыытыллар оонньуулар бүтүн дойду үрдүнэн норуоттар икки ардыларынааҕы күрэхтэһии таһымынан саамай бөдөҥнөрө уонна үрдүк таһымнаахтара буолар. Бу туһунан СӨ Ил Дарханын уонна правительствотын пресс-сулууспата иһитиннэрдэ.
Лена НОГОВИЦЫНА