Кыһыл Дэриэбинэтээҕи «Сайдыы» сынньалаҥ киинигэр сэтинньи 27 күнүгэр үтүө үгэскэ кубулуйбут «Баай барыылаах байанайдаах булчут» күрэх түөлбэлэр икки ардыларыгар ыытылынна. Байанай ыйыгар ыытыллар тэрээһин Россияҕа Дьиэ кэргэн, Саха республикатыгар Оҕо саас, Нам улууһугар Оҕо спорда, Хатыҥ Арыы нэһилиэгэр Доруобуйа уонна спорт сылларыгар ананна.
Хатыҥ Арыы нэһилиэк олохтоох дьаһалтатын, аҕа сэбиэтин көҕүлээһиннэринэн ыытылынна. Күрэх сыала: тыа сирин эр дьонун статуһун үрдэтии, билиҥҥи кэмнэ төрүт үгэһи харыстааһын, сөргүтүү, сайыннарыы, эт-хаан өттүнэн чэбдигирдии, аҕа уонна уол икки ардыгар сыһыаны күүһүрдүү, дьиэ кэргэн статуһун үрдэтии.
Күрэххэ алта түөлбэттэн биэс хамаанда кытынна. 13 саастарыттан үөһээ саастаах уолаттар аҕаларын, убайдарын кытары күрэхтэстилэр. Күрэх 6 түһүмэҕинэн ыытылынна: «Байанайга сүгүрүйүү» ыйытыктарга хоруйдааһын, «Балык хабыыта», «Мас кыһыы»,«Автоматы ыһыы», «Ох ытыыта», «Байанай бэлэҕэ».
«Сайдыы» сынньалаҥ киинин эдэр эрчимнээх уус-уран салайааччыта Михаил Сивцев иилээн-саҕалаан ыытта. Байанай күрэҕин кыттааччыларыгар эҕэрдэ тылларын олохтоох дьаһалта сүрүннүүр специалиһа Надежда Сивцева, нэһилиэк депутата Дмитрий Кривошапкин, общественнай охотинспектора Мичил Герасимов эттилэр, кыттааччыларга ситиһиилэри баҕардылар.
Күрэх спонсордарынан буоллулар: олохтоох дьаһалта, баһылык Иван Дмитриевич Ноговицын, МАУ «Спектр» дириэктэрэ Сергей Владиславович Парников, олохтоох дьаһалта сүрүннүүр специалиһа Екатерина Васильевна Стрекаловская, олохтоох урбаанньык Евгений Викторович Эверстов, Аппааны “Шиномонтаж” тэрилтэ салайааччыта Мичил Александрович Новгородов. Олохтоох дьаһалта аатыттан махтанан туран, спонсордарга махтал сурук туттарылынна.
Байанай күрэҕин кыттыылаахтара: Кыһыл Дэриэбинэ «Сандаара» түөлбэттэн (сал. Платонова А.Р.) Илья Иванович Петров уолунаан Ленялыын, Граф Биэрэгин «Восход» түөлбэттэн (сал.Алексеева А.Б.) Петр Спиридонович Федоров уолунаан Кэскил, Аппааныттан «Озернай» түөлбэттэн Алексей Александрович Корякин уолунаан Александрдыын, «Виктория» түөлбэттэн (Максимова Т.М.) Авраам Корякин уонна «Чэчир» түөлбэттэн (сал. Винокурова М.В.) убайа Леонид Ионович Чупров, «Саһарҕа» түөлбэттэн (сал. Максимова Л.Д.) убайдыы быраат Степан Колосов уонна Айдын Софронов.
Бииртэн биир түһүмэххэ түөлбэ хамаандалара тэтимнээхтик кыттаннар, ситиһии өрөгөйүн өрө туттулар. Сонун түһүмэҕинэн оҕунан ытыы көрүҥэ буолла, манна иккитэ сөпкө табан, Авраам Корякин хамаандатыгар очко аҕалла. Күрэх кууллаах оту сүгэн сүүрэн, көрдөөх эстафетанан түмүктэннэ.
Ол курдук, дьүүллүүр сүбэ быһаарыытынан: 1 миэстэни – «Сандаара» түөлбэттэн Илья уонна Леонид Петровтар, 2 миэстэни — «Восход» түөлбэттэн Петр уонна Кэскил Федоровтар, 3 миэстэни «Виктория» уонна «Чэчир» түөлбэттэн Авраам Корякин, Леонид Чупров ыллылар уонна грамотанан, мэтээлинэн, сыаналаах бирииһинэн наҕараадаланнылар. Бары кыттыбыт хамаандалар сертификат, бэлэх туттулар. Дьүүллүүр сүбэ аатыттан саамай эдэр кыттааччыга, 13 саастаах Александр Корякиҥҥа, улууска ыытыллар «Байанай күнэ» булчуттар күрэхтэригэр билет туттардылар. Бу күн түөлбэ чиэһин көмүскээбит дьонугар түөлбэ салайааччылара сэмэй бэлэхтэрин туттардылар.
Күрэххэ көмөлөспүт дьоммутугар Александр Филиппович Тохтобиҥҥа, Гаврил Петрович Макаровка тэрийээччилэр ааттарыттан махтал тылларын тиэрдэбит.
Надежда Сивцева