Нам улууһуттан Алексей Винокуров салайааччылаах бөлөх байыаннай дьайыы буола турар сиригэр тиийэн
байыастары көрсүбүтүн туһунан сулууспалыы сылдьар Нам сэлиэнньэтин олохтооҕо Иван Кириллин-“Чечен” иһитиннэрэр.
“Биир дойдулаахтарбыт, эһиги көмөҕүтүн кэлбит бөлөх тириэртэ: дойдубутун санатар аспыт-үөлбүт, ичигэс халыҥ таҥас-сап, наадалаах тэриллэри туттубут. Баҕа санаабыт туолла! Бэйэ икки ардыгар сотору-сотору “убаһа этэ, ыһаарыламмыт собо” сиэбит киһи диэн санааччыбыт, кэпсэтээччибит. Маннык сырыылар санаабытын көтөҕөр, ис туругу бөҕөргөтөр. Бу саас улуус баһылыга Юрий Слепцов салайааччылаах бөлөх кэлэн барбыта. Үчүгэй, истиҥ көрсүһүү буолбута.
Билигин тымныы күннэр саҕаламмыттарынан, ичигэс таҥастары лоп курдук кэмигэр туттубут. Сарсын, өйүүн инники кирбиигэ киирэрбитин күүтэбит. Онно абыраатаҕына, халыҥ таҥас эрэ абырыаҕа. Ону тэҥэ, таҥастарга халыҥ кээнчэлээх саппыкылар баалларыттан олус үөрдүбүт.
Бастатан туран, махтал тыллары тиэрдэбит Нам улууһун олохтоохторугар, улуус аҕа баһылыгар Слепцов Юрий Иннокентьевичка. Тус бэйэм Ленскэй нэһилиэк баһылыга Сокольников Петр Григорьевичка махтанабын. Петр Григорьевич куруук сибээскэ баар. Кыһалҕаҕа кыһарыйтардыбыт да, Ленскэй нэһилиэк уолаттара баһылыктаах дьон буоларбыт быһыытынан, убайдаатар убайбытыгар Петр Сокольниковка сибээскэ тахсабыт. Холобура, дьиэм-уотум өттүгэр, олохтоох дьаһалтаҕа толору эрэнэн манна кэтэх санаата суох холкутук сылдьабын.
Нам улууһун олохтоохторо байыаннай дьайыыга сылдьааччыларга ис санааҕытынан күүс-көмө буоларгытын, дууһаҕытынан ыалдьаргытын, үгүс көмөнү оҥороргутун, саллааттары харыстыыр, араҥаччылыыр үтүө тыллары аныыргытын, кэс тыллары этэргитин биһиги эппитинэн-хааммытынан, өйбүтүнэн-санаабытынан билэбит. Бэйэм да ааппыттан, уолаттар да ааттарыттан Намым улууһун олохтоохторугар ситиһиини, дьолу баҕарыахпыт этэ! Биһиги хаһан эрэ, дойдубутугар эргиллиэхпит!” – диэн «Чечен» видеоҕа кэпсээниттэн тиэрдэбин.
Байыастар төһө да кытаанах усулуобуйаҕа, уустук быһыыга-майгыга сырытталлар, санаалара бөҕөх буоларын видео көрдөрөр. Киһилии сиэр-майгы, киэҥ көҕүстэнии эһигиттэн арахсыбатын. Дьоҥҥут-сэргэҕит эппит тыллара эһиэхэ куйах буоллуннар!
Петр Сокольников хас биирдии саллаакка болҕомтотун уурар, истиҥ кэпсэтии таһаарар. Уопсайынан, баһылык үлэтигэр ирдэбиллээҕин норуот кэпсэтэриттэн истэҕин. Төһө да кыах тиийэринэн диэбиппит иһин, доруобуйаны көрүнүү туһунан эмиэ умнар сатамматын санатабыт.
Харысхан Попов