Нам улууһун дьоно-сэргэтэ байыаннай дьайыыга кыттыыны ылар биир дойдулаахтарыгар көмөлөһөргө бары күүһүн уурар. Байыаннай дьайыы кыттыылаахтарыгар, кинилэр чугас дьонноругар олохтоох дьаһалталар, тэрилтэлэр, түмсүүлэр, түөлбэлэр, урбаанньыттар хайа да түгэҥҥэ илиилэрин утары ууналлар.
“Байыаннай дьайыы саҕаланыаҕыттан улууспутугар көмө оҥоруутун, акция тэрийиитин үлэтэ уҕараабат. Бу барыта тэриллэн олоххо киирэригэр, биллэн турар, нэһилиэнньэ өйөбүлэ сүдү улахан.
Нам улууһугар улуус депутаттарын Сэбиэтин председателэ Алексей Винокуров Санкт-Петербурга балыыһаҕа эмтэнии ааһар байыастарга бэйэ аһын тиэрдэргэ акция тэрийэри биллэрдэ. Бүгүҥҥү күҥҥэ төрүт аһы хомуйуу сөптөөх быһаарыныы дии саныыбын. Оччотугар ас-үөл тымныы күннэринэн сибээстээн, сибиэһэйдии тиийэр. Ону кытта, тэҥинэн маскировачнай сетка хомуйа олоробут.
Көмөҕө аҕам саастаахтарбыт бэйэлэрэ төһө кыахтаахтарынан кыһаллаллар. Тэрилтэлэр, дьахтар сэбиэтэ, түмсүүлэр, дьон-сэргэ, урбаанньыттар хаһан да туора турбаттарын бэлиэтиибит. Акцияҕа кыттааччылар улуустааҕы дьиэ кэргэн уонна ыччат отделыгар 215 кабинекка нэдиэлэ устата кэмигэр аҕалан туттарыахтара. Сиһилии барытын 8-924-462-64-47 (Матрена Ильинична) эрийэн билсиэххитин сөп”, – диэн билиһиннэрэр улуустааҕы дьиэ кэргэн уонна ыччат политикатын салайааччыта Екатерина Евстафьева.
Харысхан Попов