Бартыһаан нэһилиэгин туруу үлэһит дьоно-сэргэтэ, тэрилтэлэрэ сүүрбэһис үйэ чулуу отчута Егор Афанасьевич Протопопов үбүлүөйдээх күнүгэр аналлаах уонна кини механизированнай звенотун биригээдэтин аатыгар, СӨ Үлэ, Нам улууһугар Сомоҕолоһуу, Биир Санааланыы сылларыгар анаан ыытыллыбыт «Муус 2023» диэн күрэхтэһиигэ бастыҥ ааты былдьаспыттар. Бу туһунан биһиги общественнай корреспондеммыт, нэһилиэк баһылыгын солбуйааччыта Полина Скрябина иһитиннэрдэ.
Егор Протопопов ортотугар турар
Ох курдук оҥостубут тэрилтэлэр сэтинньи 10 күнүгэр «Муҥур иэрэ» күөлгэ муус ылыытыгар көхтөөх, тыҥааһыннаах киирсиилэри көрдөрбүттэр. Егор Протопопов биригээдэтин дьонун кытта кэлэн, тэрээһини өссө ордук киэргэппиттэр.
Улахан дьону тэҥэ оскуола оҕолоро Денис Федоров салайааччылаах күрэхтэспиттэр. Кинилэр түмүгэр үһүс миэстэни ылбыттар. Иккис миэстэҕэ детсад коллектива тахсыбыт. Маныаха улуус мунньаҕын председателэ Алексей Винокуров кэлэн детсад коллективыгар киирсэн күрэхтэһэн, бар дьонугар холобур буолбут, күүстэригэр күүс эппит. Бастакы миэстэни олохтоох дьаһалта хамаандата ылбыт.
Эр дьоҥҥо уонна дьахталларга муус сүүрдүүтэ күрэхтэһии олус интэриэһинэй буолбут. Эр дьоҥҥо муҥутуур кыайыылааҕынан Михаил Колесов ааттаммыт уонна Яковлевтар анал бириистэрин — рация туппут. Манна муҥутуур кыайыылаахтарынан Дьахталларга Степанида Зырянова бастаан Егор Протопопопов биригээдэтин анал бирииһин ылбыт.
Муус таһыытыгар Станислав Гаврильев, Дмитрий Иванов, Владимир Колесов, Михаил Аргунов суоппардаах
4 массыына сүүрбүт. Барыта 24 массыына муус тахсан, байыаннай дьайыыга сылдьар уолаттар дьиэ кэргэттэригэр уонна соҕотох кырдьаҕастарга тиэллибит.
Бу курдук хоһуун үлэһит эр бэртэр, күргүөмүнэн күөлгэ тахсан киллэркэй муус ылан бар дьонноругар көмөлөспүттэр.
Кыттыбыт хамаандаларга уонна спонсордарга Егор Протопопов оҕолоругар, олохтохтоох дьаһалтаҕа, салайааччы Алексей Зыряновка, «Ураса строй» салайааччы Нюргун Садовниковка, «Саха бригада» салайааччы Иван Саввиновка, Яковлевтар дьиэ кэргэттэригэр, Иван Яковлевка, Партизан нэһилиэгин эр дьонугар, төрүт олохтоох партизаннарга уонна Егор Протопопов биригээдэтигэр, «Уником» ХЭТ салайааччы Николай Петровка махталларын тиэрдэллэр. Кыттан миэстэлэспит дьон бары илии тутуурдаах барбыттар.
Олохтоох дьаһалта ис миинэ буһаран, чэй өрөн, итии аһылыгынан быспакка хааччыйбыт. Бу тэрээһини судьуйалаан, комментатордаан Иван Яковлев ыыппыт.
Лена Ноговицына