Ахсынньы 15 күнүгэр, Хамаҕатта нэһилиэгин “Тускул” оҕо саадыгар, Россияҕа Педагог уонна Наставник сылын түмүктүүр улуустааҕы “Лучший помощник воспитателя-2023 ” күрэх үрдүк таһымнаахтык ааста. Уопсайа күрэххэ 8 иитээччи көмөлөһөөччүтэ кытынна. Хатыҥ Арыы нэһилиэгиттэн Аппааны бөһүөлэгин “Сандаара” оҕо сайдар кииниттэн (сэб. Маркова Н.Е.) Анастасия Парникова, Граф Биэрэгин “Ромашка” оҕо саадыттан (сэб. Матвеева Т.Б.) Галина Сивцева кытыннылар.
Күрэхтэһии түөрт түһүмэҕинэн ыытылынна, ол курдук бастакы түһүмэххэ — бэйэни билиһиннэрии, иккискэ — СанПин ирдэбилин билии, үһүскэ оҕолору кытта биир тэрээһин түгэниттэн көрдөрүү уонна төрдүс — “Минута Славы” талааны көрдөрүү буолла.
Бары кыттааччылар ох курдук оҥостон кэлэн, түмүккэ маннык кыайыылаахтар быһаарыннылар. 1 м. — Нам сэлиэнньэтин “Кыталык” 6-с №-х оҕо сайдар кииниттэн Цыпандина Акулина Петровна, 2 м. — 1 Хомустаахтан 1 №-дээх “Мичийээнэ” оҕо саадыттан Окоемова Евдокия Назаровна уонна 3 м. – Граф Биэрэгин “Ромашка” оҕо саадыттан Сивцева Галина Николаевна. Онтон Парникова Анастасия Дмитриевна “Лучшее совместное мероприятие с детьми” анал номинация хаһаайката буолла.
“Ромашка” оҕо саадын коллектива коллегаларын Галина Николаевнаны өйөөннөр плакаттаах, өрө көтөҕүүлээх тэрээһиннээх кэлэн күүс-көмө өйөбул буоллулар. Нэһилиэкпититтэн күрэххэ кыттыбыт эдэр кыргыттарга өссө да үлэлэригэр үрдүк ситиһиилэри, дьиэ кэргэҥҥэ байылыат олоҕу баҕарабыт.
Надежда Сивцева