Олунньу 22 күнүгэр, Аппааны сэлиэнньэтин «Чороон» норуот айымньытын киинигэр, 13-с төгүлүн общественность форума ыытылынна. Форум Хатыҥ Арыы нэһилиэк өрөгөй ырыатынан саҕаланна, 38 киһи кыттыыны ылла.
Дмитрий Кривошапкиҥҥа, оҕо сайыҥҥы сынньалаҥын «Сайылык оҕолоро» дьиэ кэргэн биригээдэтин салайааччытыгар, Нам улууһун баһылыгын э.т. Анатолий Павлов махтал суругу, Хатыҥ Арыы нэһилиэгин ветераннарын уонна пенсионердарын сэбиэтин председателэ Оксана Лебедеваҕа үбүлүөйүнэн нэһилиэк бочуоттаах грамотатын туттардылар.
2023 — Педагог уонна Наставник сылын түмүктээн, нэһилиэк наставниктарыгар: Дмитрий Ноговицыҥҥа, Клавдия Носковаҕа, Анна Васильеваҕа, Нина Саввиноваҕа, Мария Марковаҕа, Екатерина Петроваҕа, Дмитрий Елисеевка, Айталина Винокуроваҕа, Людмила Петроваҕа, Тамара Колесоваҕа, Тамара Николаеваҕа, Александра Колесоваҕа баһылык грамоталарын, махтал суруктарын туттардылар.
Нэһилиэк спорт уонна ыччат отделын дириэктэрэ Егор Бурнашев Саха өрөспүүбүлүкэтигэр физкультурнай хамсааһын 100 сылыгар анаммыт түөскэ кэтиллэр бэлиэнэн нэһилиэк ветеран бастыҥ спортсменнарыгар туттарда. Ол курдук, Николай Соловьев, Афанасий Саввинов, Гаврил Протопопов, Наталья Соловьева, Петр Яковлев, Анатолий Матвеев, Оксана Бочирова, Иннокентий Овчинников наҕараадаланнылар.
Форумҥа араас сылларга общественноһы кытта ыытыллыбыт үлэ туһунан баһылык Иван Ноговицын иһитиннэрии оҥордо. Салгыы сүрүннүүр исписэлиис Надежда Сивцева 2014 сылтан саҕалаан түөлбэлэр икки ардыларыгар ыытыллар күрэх 2024 сыллаах балаһыанньатын ылыныы, түөлбэлэр активтарын, общественноска льгота өҥөтүн, хас түөлбэ аайы хайысханан куратордар анаммыттарын, түөлбэлэргэ депутаттар сыһыарыллан үлэлииллэрин о.д.а. араас боппуруостары таарыйда.
Хатыҥ Арыы нэһилиэгэ улууска обшественноһы кытта үлэҕэ биир бастыҥнар кэккэлэригэр сылдьар. Араас сылларга өрөспүүбүлүкэтээҕи куонкурстарга, күрэхтэргэ кыттан Нам улууһун чиэһин көмүскүүр, ситиһиилэрэ үгүс. Ханнык баҕар үлэ общественноһа суох барбат, ол эбэтэр өссө Сэбиэскэй сойуус саҕана биһиги эбээлэрбит, эһээлэрбит, ийэлэрбит, аҕаларбыт Коммунистическай партия, хомсомуол, пионерия иитэн таһаарбыт патриоттара, өрүүтүн үлэҕэ, үөрэххэ инники сылдьаллара. Оттон билигин хайдаҕый?
Билигин дьон-сэргэ олоххо көрүүтэ олох атын, олохпут киһи олоророругар бары өттүнэн тубуста, сайынна. Ону тэҥэ, общественнай үлэҕэ көрүүлэр, кыттыылар эмиэ тосту уларыйдылар. Дьиэттэн таһааран, общественнай олоххо кытыннарарга, дьону түмэргэ сорох өттүгэр ыарахаттары көрсөбүт. Дэлэ кинигэ, хаһыат ааҕыыта аҕыйаабыт буолуохтаах. Олохпут хаамыытынан билигин электроннай кинигэлэр, хаһыаттар, ватсап, телеграмм курдук социальнай ситим элбээтэ, аҕыйах сыллааҕыта киһи өйүгэр да батарбат тыллара бааллар. Ол гынан баран, олоххо саҥалыы көрүү, саҥа хайысханы арыйыы, ыччаттары, нэһилиэк дьонун түмэн араас граннарга бырайыак суруйан кыттыы, тэрилтэнэн, аймаҕынан кинигэ, буклет таһаарыы үксээтэ, бу билиҥҥи олохпут ирдэбилэ буолла.
Билигин Хатыҥ Арыы нэһилиэгин иһинэн 15 общественнай түмсүү үлэлиир. 7 түөлбэ, ол иһигэр Аппааныга — 4, Кыһыл Дэриэбинэҕэ — 1, Граф Биэрэгэр 1 түөлбэ баар. Уопсайа 21 кулууп ситиһиилээхтик үлэлиир.
Общественность форумун быһаарыытынан, түөлбэлэр уонна сэбиэттэр председателлэрэ сайыҥҥы водопроводка, баанньыкка суунууга 100% льготанан туһаналлар. Онтон Сэбиэттэр истэригэр баар активтар сайыҥҥы водроводка 100% льготалаахтар.
Олохтоох дьаһалта, общественность көмөтүнэн нэһилиэккэ элбэх араас хайысхалаах үлэлэр ыытыллаллар. Ол курдук, 15-с сылын «Киэргэн, сырдыгынан сыдьаай саҥа сыл!» диэн девизтээх муус, хаар оҥоһукка күрэх ыытыллара үгэскэ кубулуйда. Маны таһынан, «Бастыҥ олбуор», «Байанай күрэҕэ», «Аҕа күрэҕэ», «Что? Где? Когда?» о.д.а. түөлбэлэр икки ардыларыгар сыл устата буолар араас культурнай, спортивнай тэрээһиннэр ыытыллыбыттара номнуо үтүө үгэскэ кубулуйда. Бу олус тэрээһиннээх, интэриэһинэй бачыымы өр сылларга Хатыҥ Арыы нэһилиэгин баһылыгынан үлэлээбит Юрий Иннокентьевич Слепцов толкуйдаан киллэрбитэ. Маны таһынан, улууска ыытыллар тыа хаһаайыстыбатын дьаарбаҥкаларыгар нэһилиэкпит өрүү бастыҥнар кэккэлэригэр сылдьар.
Общественниктар кэккэлэригэр билигин даҕаны өр сылларга үлэлии сылдьар бастыҥ общественниктарынан буолаллар: Клавдия Носкова, Мария Чирикова, Марианна Винокурова, Людмила Петрова, Татьяна Евсеева, Елизавета Олесова, Мария Кривошапкина, Оксана Лебедева, Дария Мальцева, Раиса Уваровская, Мичил Герасимов, Дмитрий Кривошапкин, Павел Оконешников, Александра Платонова о.д.а. буолаллар.
Форум түмүк чааһыгар аҕа саастаах общественник-наставниктарбыт Клавдия Носкова, Нина Саввина, Мария Маркова, Людмила Петрова общественность үлэтигэр бэйэлэрин санааларын, этиилэрин киллэрдилэр. Түөлбэ үлэтин күүһүрдүү, хабылык, хаамыска, сахалыы остуол оонньуутун түөлбэлэргэ күрэх быһыытынан ыытарга, араас граннарга бырайыак суруйан кыттыы, общественнай олоххо оскуолаттан саҕалаан ыччаттары угуйарга диэн киирбит этиилэр форум резолюциятыгар эбии киирдилэр.
Надежда Сивцева