Үөдэй нэһилиэгэ сыллата хаһыакка сурутуу аахсыйаларга көхтөөхтүк кыттар. Нэһилиэк дьаһалтата Саҥа 2025 сылы көрсө, бэтэрээннэргэ дьоһун бэлэх оҥоро, тэрилтэлэр ортолоругар сурутуу аахсыйатын көҕүлээн тэрээһиннээхтик ыытта.
Аахсыйаҕа улууспут “Эҥсиэли” хаһыатыгар биир бастакынан нэһилиэк баһылыга Иван Васильевич Гаврильев суруйтарда. Нэһилиэк дьаһалтатын бары специалистара, З.П. Саввин аатынан Үөдэй орто оскуолата, “Чуораанчык” оҕо саадын коллектива, И.Зырянов аатынан культурнай-спортивнай комплекс, “Сарыал” сынньалаҥ киин, олохтоох баһаарынай чаас тэрилтэлэрэ, маны таһынан улуус бэтэрээннэрин сэбиэтэ “Эҥсиэли” хаһыакка суруйтаран, аҕам саастаах көлүөнэҕэ күндү бэлэх оҥордулар.
Уопсайа “Эҥсиэли” хаһыакка 16, “Арчы” хаһыакка 15 ытык дьоммутугар — тыыл бэтэрээннэригэр, сэрии кэмин оҕолоругар, үлэ бэтэрээннэригэр аахсыйанан сурутуу ыытылынна. Аҕам саастаах ытык дьоммутугар Саҥа 2025 сылга сабыс саҥа сибиэһэй, типография сыттаах хаһыаттар, үөрүү-көтүү үктэллээх, үтүө сонун кэһиилээх, дьоллоох олоҕу түстээтиннэр.
Екатерина Эверстова, Үөдэй
Редакцияттан: 2025 сыл үүннэҕинэ да, “Эҥсиэли” хаһыакка суруйтарыахха сөп. Тохсунньуга суруйтардаххына, олунньуттан ааҕаҕын. Сурутуу сыаната: 1 ыйга-132,90 солк., сыл аҥарыгар (6 ыйга)-797,40 солк., 1 сылга (12 ыйга)-1607,97 солк