Быйыл Нам улууһун ветеринарнай сулууспатын 100 сыла. Партизан нэһилиэгин ветеринарнай учаастагар билигин икки үлэһит баар. Кинилэр сыстыганнаах ыарыы турбатын туһугар туруулаһаллар. Иккиэн уопуттаах фельдшердэр. Нэһилиэккэ сылгы-сүөһү ахсаана аччаабакка турар. Бу кинилэр үлэлэрин түмүгэ дии саныыбыт.
Джулияна Саввинова, Партизан ветеринарнай учаастагын сэбиэдиссэйэ:
Ветеринарынан 1991 сылтан үлэлиибин. Партизаҥҥа үлэлии кэлэрбэр учаастакка начальнигынан, сэбиэдиссэйинэн Полина Ивановна Скрябина үлэлии олорор этэ. Кини биһигини үөрэ-көтө олус үчүгэйдик көрсөн үлэлэтэн, элбэх уопутун бэрсэн, идэбитигэр такайбыта. 2004 сыллаахха Полина Ивановна миигин үрдүк үөрэхтээх вет. быраас буолуохтааххын диэн модьуйан туран ыытан үөрэттэрэн, бу билигин вет. быраас идэтин ылан олоробун. Оччолорго биһиэхэ фельдшеринэн С.К. Аргунова, бырааһынан А.Н. Григорьев о.д.а. кэлэн үлэлээн-хамсаан барбыттара.
Быйыл үлэлээбитим 31 сыл буолла. Сүрүн үлэбитинэн сыстыганнаах ыарыы турбатын хонтуруоллуубут, ол курдук, сүөһүлэргэ быһыы туруорабыт. Ону таһынан үүт-эт тех. регламенын тутуһаммыт бэрэбиэркэлэри ыытабыт. Учаастак фельдшерэ Дмитриева Елена Петровна, кини 90-с сыллартан үлэлиир уопуттаах ветеринар.
Ветеринарнай управлениебытын, коллегаларбытын бу өрөгөйдөөх үбүлүөйгүтүнэн – 100 сылгытынан эҕэрдэлиибин, бары чөл доруобай буолуҥ.Уһуннук вет. фельдшеринэн үлэлээбит Светлана Аргунова буолар. Кини үөрэҕин бүтэриэҕиттэн илиитин араарбакка, бэтэринээр идэтигэр бэриниилээхтик үлэлии сылдьар.
Светлана Аргунова, вет. фельдшер:
Мин 1981 сыллаахха Төҥүлүтээҕи 4 №-дээх СПТУ-га ветеринар идэтигэр үөрэнэ киирбитим. Үс сыл үөрэнэн 1984 сыллаахха ветфельдшер идэтин ылан үөрэхпин бүтэрэн «Партизан» сопхуоска үлэлии кэлбитим. Наставниктарбынан Лидия Избекова, Надежда Перевалова этилэр. Оччолорго Партизаҥҥа ыанньык ынах 800 этэ, сопхуос 6 сайылыктааҕа. 1990-с сылларга Полина Скрябина, Прокопий Потапов, Джулияна Саввинова, Елена Дмитриева, Аркадий Григорьев буолан үлэлээбиттэрэ. 20 сыл бары тутуспутунан бииргэ эйэлээхтик сопхуос отделениетыгар үлэлээбиппит. Ол сылларбын, билигин санаатахпына, олус астынабын. 2007 сылга Нам ветеринарнай учаастагар үлэлии барбытым. Онно тиийэн 10-тан тахса сыл үлэлээбитим. Билигин лабораторияҕа үлэлии сылдьабын. Үлэлээбит ыстааһым быйыл 39 сыл буолла.
Ветеринарнай сулууспа 100 сылынан бииргэ үлэлээбит коллегаларбын, биир идэлээхтэрбин барыларын итиитик-истиҥник эҕэрдэлиибин.
Полина Скрябина, Партизан