Бөтүҥҥэ Нам улууһун дьаһалтатын 2023 с. ыыппыт үлэтин отчуотугар 38 киһи кыттыыны ылла. 2-с бөлөх салайааччыта Юрий Дьяконов иһитиннэриитин кэнниттэн олохтоохтор ааспыт сыллааҕы ыйытыыларынан туох үлэ ыытыллыбытын билиһиннэрдэ.
Кэпсэтиигэ олохтоохтортон элбэх туруорсуу үөрэх, доруобуйа харыстабылын салаатыгар киирдэ. Оскуола дириэктэрэ Александр Дмитриев улууска биир кырдьаҕас оскуола дьиэтэ билигин эргэрбитин, тымныйбытын, үлэлииргэ үгүс күчүмэҕэйдэри көрсөллөрүн ахтан туран, саҥа оскуола тутуутун, туспа турар начаалынай оскуола дьиэтигэр благоустройство киирэрин туруоруста. Саҥа оскуолаҕа бырайыактыырга сорудах докумуоннара толоруллан СӨ үөрэҕин министиэристибэтигэр тиэрдиллибитин, благоустройствоҕа сметата, бырайыага оҥоһуллубутун эттэ. Ону сэргэ оскуола биллиилээх поэт Таллан Бүрэ аатын сүгэринэн быйыл 115 сааһын туолар үбүлүөйдээх сылыгар оскуола территориятыгар кини бюһун туруорарга үлэни саҕалыыр боппуруоһун көтөхтө.Төрөппүттэр оҕо аһылыгын харчыта 80 солк. тоҕо үрдээбэтин, элбэх оҕолоох ыалларга чэпчэтии тоҕо көрүллүбэтин ыйыттылар.
«Сардаана» оҕо уһуйаанын сэбиэдиссэйэ Елизавета Иванова саҥа дьиэ сорох сирдэринэн муостататымныытын, ититии систиэмэтигэр дьиэктэр көстүбүттэрин, түннүктэр хайыта барбыттарын о.д.а. итэҕэстэри этэн туран туоратары туроруста, антитеррор ирдэбилинэн территория ис өттүн толору сырдатар боппуруоһун көтөхтө.
Олохтоохтор улуустааҕы киин балыыһаҕа сүрэх, харах быраастара тоҕо суохтарын, нэһилиэги тоҕо Модукка сыһыарбыттарын сурастылар. Урукку курдук Аппааны амбулаториятыгар сыһыарары туруорустулар. Олохтоох культура норуот айымньытын дьиэтигэр эбии штат, олохтоох производственнай учаастакка эбии слесарь көрүллэр ыйытыыларын биэрдилэр. Доруобуйаларынан кыаммат дьоҥҥо болҕомто күүһүрэригэр баҕардылар. Ити курдук бөтүҥнэр мунаарар туруорсууларын тиэртилэр, барыта 18 ыйытыыны биэрдилэр.
Түмүккэ Юрий Вячеславович этиилэр боротокуолга киирбиттэрин, онон үлэ ыытыллыаҕын эттэ, нэһилиэккэ эдэр ыаллары өйүүргэ элбэх үлэ барарын бэлиэтээтэ, отчуокка кэлэн кыттыбыттарыгар махтанна. Бөтүҥнэр «Нам улууһа» МТ дьаһалтата 2023 с. ыыппытын үлэтин биһирииллэрин биллэрдилэр. Мунньах кэнниттэн сорох дьон бэйэлэрин кыһалҕаларынан тэрилтэ салайааччыларын көрсөн, сүбэ-ама ыллылар.
Касьян Олесов-Олук