Нам улууһуттан П.П. Ядрихинскай-Бэдьээлэ аатынан Олоҥхо дьиэтиттэн дириэктэр Вера Колпашникова, Владимир Сыромятников, Андрей Осипов, Руслан Захаров Саха сирин делегациятыгар киирэн Казахстаҥҥа Саха өрөспүүбүлүкэтин күннэригэр кытыннылар.
Бу күннэргэ делегация Казахстаны өрө көтөхпүт президент Нурсултан Назарбаев, норуот ырыаһыттара Джамбул уонна Умбенталы аатынан түмэллэри көрдө-иһиттэ. Холобура, норуот ырыаһыта Джамбул түмэлигэр Саха сирин суруйааччылара бэлэх ууммут чорооннорун бэлиэтии көрбүттэр.
“Казахтар олоҥхоһуттарыгар улахан болҕомто ууран кэлбиттэр эбит. Кинилэри бочуоттаан, ааттарын ааттаан олорбут таас дьиэлэрин түмэл оҥорбуттар. Билигин түмэллэргэ олоҥхоһуттар сыдьааннара дириэктэрдээн, салайан олороллор”, – диир Олоҥхо дьиэтин дириэктэрэ Вера Колпашникова.
Харысхан Попов