Бөтүҥ нэһилиэгэр балаҕан ыйын 27 күнүгэр «Айылгы» культура киинин киэҥ түһүлгэтигэр Сахабыт республикатын Судаарыстыбаннаһын күнүн чэрчитинэн, үтүө тэрээһиннэр буолан аастылар.
Бэлиэ күн республикабыт Өрөгөй ырыатынан саҕаланна. «Бөтүҥ нэһилиэгэ» МТ баһылыгын солбуйааччы Маркова Галина Прокопьевна, нэһилиэк ветераннарын сэбиэтин председателэ Михайлова Людмила Васильевна бэйэлэрин эҕэрдэлэрин тиэртилэр. Мустубут дьоҥҥо олохтоох библиотека сэбиэдиссэйэ Валентина Колесова Саха сирин историятыгар аналлаах викторина ыытта. Кыайыылааҕынан 11-с кылаас үөрэнээччитэ Ярослав Сивцев буолла.
Тэрээһин иккис чааһыгар Е.С. Сивцев-Таллан Бүрэ аатынан орто оскуола, С.П. Оконешников аатынан «Айылгы» култуура киинин үлэһиттэрин көҕүлээһиннэринэн, сыллата ыытыллар “Урожай-2024” быыстапка-дьаарбаҥка тэриллэн оҕуруот аһын арааһа, сир аһын амтаннааҕа, сиэдэрэй сибэкки эгэлгэтэ тэлгэннэ.
Көмүс күһүн күндү бэлэхтэрэ көрбүтү эрэ кэрэхсэттэ, сылдьыбыты эрэ дуоһута сынньатта. Бу күнү нэһилиэк олохтоохторо оскуола оҕотуттан эмэнигэр тиийэ түмсэн күргүөмнээхтик атаардылар. Оскуола үөрэнээччилэрэ «Чудо овощ», «Оригинальнай сэлээппэ» күрэхтэргэ көхтөөхтүк кытыннылар. Дьүүллүүр сүбэ оҕуруот аһын төһө уратытын, дьиктитин, сэлээппэ оҥоһуутун, киэргэтиитин, ураты көстүүтүн сыаналаатылар.
Уопсай түмүккэ сэлээппэ күрэҕэр кыра кылаастарга Иванов Арсен (1 кыл.), Заровняева Диана, Лукина Санаайа (1 кыл.), Суздалова Сайыына (4 кыл), улахан кылаастарга Иванова Вилена (7 кыл), Яковлева Зарина (9 кыл) миэстэлэһэн дипломнарынан наҕараадаланнылар. «Саамай, саамай» оҕуруот аһын көрүүгэ дьикти быһыылаах оҕуруот астарын көрдөрөн Суздалов Эрчимэн «Саамай улахан тыква», Филиппов Афоня «Саамай кыра тыква», Харитонов Владик, Ушницкая Намыына «Саамай оригинальнай оҕуруот аһа» номинация кыайыылаахтарынан тахсан дипломнарынан бэлиэтэннилэр.
Бу күн үөрэнээччилэр төрөппүттэринээн ас астаан аҕалан атыылаан, кылаастарыгар үп киллэриннилэр.
Тэрээһини үөрэнээччилэр эҕэрдэ үҥкүүлэринэн, ырыаларынан киэргэттилэр.
Валентина Колесова