Намнааҕы “Олимпик” спорт оскуола 11 эдэр дуобаччыта Мэҥэ Хаҥаласка алтынньы 13 күнүгэр Е.Ф. Колосов кэриэһигэр буолбут нуучча дуобатыгар өрөспүүбүлүкэтээҕи турнирга ситиһиилээхтик кытыннылар.
Алдан, Дьокуускай куораттартан, Нам, Таатта, Чурапчы, Мэҥэ Хаҥалас улуустарыттан 106 кыттааччы 64 харахтаах дуобакка оонньообутун тренер Надежда Протопопова этэр.
2011-14 сыллаахтарга улуустааҕы гимназия 5-с кылааһын үөрэнээччитэ Олесов Саян 2-с миэстэ буолбут. 2015-16 сыллардаахха Намнааҕы алын кылаас оскуола 3-с кыл. үөрэнээччитэ Аргунов Давид 3-с миэстэни ылбыт. Оттон быйыл дуобакка саҥа үөрэнэн саҕалаабыт Намнааҕы 1-кы нүөмэрдээх оскуола 1 кылааһын үөрэнээччитэ Устинова Дайаана 3-с миэстэҕэ тахсыбыт.
“Биир күннээх дуобат күрэхтэһиитигэр ситиһиилээхтик кытынныбыт диэн санаалаах кэллибит. Куруук буоларын курдук, айан суолугар, оҕону көрүүгэ-истиигэ күүс-көмө буолар төрөппүттэрбэр махтанабын. Ол курдук, Матаннановтар, Устиновтар, Григорьевтар дьиэ кэргэттэригэр”, – диир тренер Надежда Георгиевна.
Харысхан Попов