Нам улууһугар алгыстаах таҥастары тигэр, быысыпкалаан ойуу түһэрэр “Битик” иис сыаҕа 2020 сылтан үлэлиир. Бу сыаҕы социальнай контрагынан уонна бэйэ дьыалатын тэринии көмөтүнэн индивидуальнай предприниматель буолбут Оксана Васильева күн бүгүҥҥэ диэри үлэлэтэр.
Бу күннэргэ Оксана Егоровна айан тикпит дьабакалаах сахалыы стиллээх худилара социальнай ситимнэргэ тарҕанан, дьон биһирэбилин ылла.
— Маннык чопчуурдаах дьабака курдук капюшоннаах, сахалыы стилизованнай худилары тикпитим биир сыл буолбут. Былырыын күһүн маҥнайгы худибын тикпитим. Сакаастыыр киһи баҕатынан араас өҥнөөҕү тигэбин.
“Битик” диэн сахалыы стиллээх таҥастары тигэрим сыала-соруга өбүгэттэн кэлбит ииспит үгэһин үйэтитэн, аныгылатан, ыччат күннээҕи кэтэр таҥаһын тигии буолар. Сахалыы таҥаспыт биһиэхэ бэйэтэ улахан харысхал, оһуордарбыт алгыс буолаллар. Араас оһуору быысыпкалаан таҥаска түһэрэбин, онно анаан-минээн оһуордар ис хоһооннорун быһаарар үөрэхтэргэ билиибин хаҥаппытым. Ииһим миэхэ иэйиим уонна итэҕэлим буолар, — диэн Оксана Васильева санаатын үллэстэр.
Сахалыы тыыннаах, аныгылыы моһуоннаах, хатыламмат кэрэ көстүүлээх таҥастары тиктэриэххитин баҕарар буоллаххытына, 8-914-102-95-05 тел. нүөмэринэн билсиэххитин сөп. Аадырыс: Нам улууһа, Нам сэл., Ленина аат. уулусса 18а дьиэтэ, «Бизнес инкубатор».
Майя ФЕДОРОВА