Дьокуускайга “Триумф” спорт комплекска боксаҕа кыргыттарга Саха сиригэр бастыыр иһин күрэхтэһиигэ улуустааҕы “Олимпик” спорт оскуола иитиллээччилэрэ кыһыл, үрүҥ көмүс, боруонса мэтээллэри ыллылар.
“Боксаҕа 2007-08 сс., 2009-10 сс., 2011-12 сс. төрүөх кыргыттарга тохсунньу 11 күнүттэн саҕаламмыт турнир 14 чыыһылаҕа түмүктэннэ. Бу күннэргэ боксанан дьарыктанааччы 45 кыыс кыайыыга дьулуурун, кыаҕын көрдөрдө”, – диир “Олимпик” спорт оскуола дириэктэрэ Изабелла Массаева.
Дьокуускай, Мииринэй куораттарын, Хатас сэлиэнньэтин, Сунтаар, Бүлүү, Кэбээйи, Уус Алдан, Мэҥэ Хаҥалас, Чурапчы улуустарын бастыҥтан бастыҥнарын кытта рингэҕэ Аммосова Алина, Данилова Илона, Сивцева Дайаана, Федорова Тома көрүстүлэр. Ол курдук, Нам улууһун чиэһин көмүскүүр Алина Аммосова 54 кг ыйааһыҥҥа кыайыылаах үрдүк аатын ылла; Данилова Илона 46 кг – 2 миэстэ; Сивцева Дайаана 52 кг – 2 миэстэ уонна Федорова Тома 57 кг – 3 миэстэ.
Турнир кыайыылаахтара Уһук Илин бастыыр иһин күрэхтэһиигэ барар сүүмэрдэммит хамаандаҕа киирдилэр.
Харысхан Попов