Балаҕан ыйын 28 күнүгэр Нам улууһун дуобакка Федерациятын көҕүлээһининэн «Укдуоба» күрэхтэһиитэ тэрилиннэ. 1 Хомустаахтан, Партизантан, Никольскайтан, Хамаҕаттаттан, Хатыҥ Арыыттан, Граф Биэрэгиттэн, Бөтүҥтэн, Модуттан барыта 26 киһи кытынна.
Турнир кыттыылаахтара 9 эргииргэ компьютер таһаарар сэрэбиэйинэн утарыта оонньоотулар. Үс көрүҥ түмүгүнэн 1м.– Егор Леонтьев (Хамаҕатта), 2м.- Марфа Алексеева (Нам), 3м.-Розалия Егорова (Нам) ыллылар. Күүстээх састаапка инники тахсан, кыайыыны ылбыт оонньооччулар мэтээллэринэн, грамоталарынан уонна улууска дуобат спорда сайдарыгар өрүү көмөлөһөр Алексей Кузьмин бириискэ туруорбут убаһатын этигэр сертификаттары туттулар. Ол курдук, кыайыылаах Егор Леонтьев – убаһа этин аҥарыгар, Марфа Алексеева, Розалия Егорова иккис аҥарын «үллэһиннилэр». Тэрийээччилэр быһаарыыларынан 4м., 5м. тахсыбыт оонньооччулар бириискэ эмиэ тигистилэр: Алексей Кузьмин (Нам) – убаһа иһигэр, Иннокентий Кузьмин (Партизан) – убаһа быарыгар.
Биирдиилээн көрүҥнэринэн түмүк эмиэ таҕыста. Уксааҥҥа: 1м.–Иннокентий Кузьмин (Партизан), 2м.-Анатолий Матвеев (Хатыҥ Арыы), 3м.-Иван Леонтьев (Никольскай). Дуобакка: 1м.-Егор Леонтьев (Хамаҕатта), 2м.-Валерий Эверстов (Хатыҥ Арыы), 3м.-Геннадий Яковлев (Партизан). Баарыска: 1м.-Егор Леонтьев (Хамаҕатта), 2м.-Алексей Кузьмин (Нам), 3м.-Ион Васильев (Модут). «Укдуоба» оонньуутугар дьахталларга түмүгү туһунан эмиэ таһаардылар: 1м.-Марфа Алексеева (Нам), 2м.-Розалия Егорова (Нам), 3м.-Лина Полякова (Граф Биэрэгэ).
Кинилэр бука бары мэтээллэринэн, грамоталарынан, сыаналаах бириистэринэн, дьахталлар — «Көмүлүөк» фирма сахалыы иһиттэринэн наҕараадаланнылар. Күрэхтэһиини дуобат оонньуу энтузиаһа Анатолий Матвеев тэрийдэ, кылаабынай судьуйанан «Олимпик» спортивнай оскуола дуобакка тренерэ Надежда Протопопова үлэлээтэ, бириистэри барытын Алексей Кузьмин туруорда.
Киин улуустарга «Укдуоба» оонньуу ордук Мэҥэ Хаҥаласка, Тааттаҕа ыытыллар, оттон биһиги улууспутугар бу ботуччу бириистээх бастакы турнир тэрилиннэ.
Касьян Олесов-Олук