Нам улууһун Хатыҥ Арыы нэһилиэгэр от ыйын 1 күнүттэн 14 оҕолоох «Бригантина» сервиснэй этэрээт үлэтин тэтимнээхтик саҕалаата. Аппааны бөһүөлэгэр баар биир дойдулаахпыт, тылбаасчыт, бэйиэт Илья Дорофеевич Винокуров-Чаҕылҕан скверигэр билиитэ быыһынан үүммүт сыыс оту үргээтилэр, сибэккилэргэ уу куттулар. От ыйын 31 күнүгэр бэйиэт 110 сааһын үөрүүлээхтик бэлиэтиэхпит.
Маны тэҥэ Надежда Сивцева салайааччылаах этэрээт Аммосов уулусса 7-с нүөмэрдээх икки этээстээх уопсай дьиэ таһыгар баар оҕо былаһааккатын бөҕүн уопсайа 5 куулу хомуйдулар.
Граф Биэрэгэр түөрт оҕолоох Саргылана Сметанина салайааччылаах этэрээт күннэтэ боротуоха кытыытын, суоллары, сөтүөлүүр сир, ледорез таһыгар бөҕү хомуйаллар.
Нэһилиэкпит, тулалыыр сирбит ыраас буоларын туһугар оҕолорбут үлэлэрин харыстыаҕыҥ, убаастыаҕыҥ!
Надежда Сивцева