Сэтинньи 10 күнэ – ис дьыала уорганнарын сотрудниктарын күнэ. Нам улууһун ис дьыалаҕа отделын начальнигынан 2024 с. тохсунньу 19 күнүттэн полиция подполковнига Михаил Кокарев ананан үлэлиир.
Нам улууһун ис дьыалаҕа отделын сотрудниктара үлэлэрин, сүктэриллибит соругу сиэрдээхтик толороллор. 2024 сыл 10 ыйын түмүгүнэн 155 буруйу оҥоруу бэлиэтэммит. Былырыын бу кэмҥэ 170 буруйу оҥоруу таһаарыллыбыт, онон 2023 с. кытта тэҥнээтэххэ, намтааһын тахсыбыт.
Билигин буруйу оҥоруу саҥа көрүҥэ – түөкүннээһин (масыанньыктааһын) элбээбит. Манна Интернет ситимин, компьютернай техниканы эбэтэр, суотабай төлөпүөнү туһанан уонна дьон дааннайын булан, дойду хайа баҕарар муннугуттан кинилэргэ сибээскэ тахсан, сибидиэнньэ ылан, түөкүннүүллэрэ үксээбит. Бу хайысхаҕа ааспыт сылга 29 буруйу оҥоруу таһаарыллыбыт буоллаҕына, быйыл – 36-ҕа тэҥнэспит. Урукку өттүгэр пенсионердар эбит буоллаҕына, билигин түргэнник харчыланар, чэпчэкитик үбү булунар инниттэн, сааһыттан тутулуга суох киирэн биэрээччи элбээбит. Барыта 36 киһи эмсэҕэлээбит, холбоон 4 362 038 солк. суумалаах хоромньу таһаарыллыбыт, ирдэбил үлэ ыытыллар. Полиция сотрудниктара өйдөтөр-сэрэтэр үлэни хаһыат нөҥүө уонна улуус дьаһалтатын кытта бииргэ ыыталлар.
Быйыл улууска ыар уонна ураты ыар буруйдары оҥоруу, бу көрүҥҥэ түөкүннээһин киирэринэн, үрдээбит – 44 тэҥнэспит, ол иһигэр киһини өлөрүү бэлиэтэммит. Былырыын бу кэмҥэ 28 ыар буруй оҥоһуллубут. Дьиэҕэ-уокка 2 «бытовой» буруйу оҥоруу таһаарыллыбыт. Сокуоннай саастарын ситэ илик оҕолор буруйу оҥоруулара былырыын 2 эбит буоллаҕына, быйыл 6-ҕа тэҥнэспит. Тэрилтэлэри кытта бииргэ өйдөтөр үлэни ыыталлар. Үлэ көдьүүстээх буоларын ситиһэр инниттэн, учуокка турар оҕолорго хас биирдиилэригэр полиция сотрудниктарын сыһыарбыттар, оттон олохтоох дьаһалталар, оскуолалар бэйэлэрин өттүлэриттэн эппиэттээх үлэһиттэри анаабыттар.
Отдел сотрудниктара наркотигы утары үлэҕэ СӨ ИДьМ наркотигы сокуоннайа суох эргитиигэ Управлениены кытта ыкса үлэлэһэллэр. Быйыл улууска наркотигы туттууга 2 буруйу оҥоруу бэлиэтэммит. Бу хайысхаҕа улуустааҕы тыа хаһаайыстыбатын управлениетын кытта 2 Хомустаах, Хамаҕатта, Модут, Партизан нэһилиэктэригэр көлөппүнэ үүнэр сирдэрин бэрэбиэркэлээбиттэр. Сирдээх дьону кытта профилактика үлэтин эрдэттэн ыытан, хаһаайыннар сирдэригэр бу үүнээйини суох оҥорбуттар. Ону сэргэ Хамаҕаттаҕа ИП Жирков А.С. сиригэр-уотугар Дьокуускайтан тахсыбыт эдэр ыччат бөлөҕүн кытыннаран, көлөппүнэни суох оҥорууга үлэлээбиттэр.
Бу хайысхаҕа улуустааҕы киин балыыһа наркокабинетын кытта ыкса үлэлэһэллэр. Туһааннаах информацияны хардарыта бэрсэн, докумуоннарын сааһылаабыттар. Биэстии сылынан наркотигы сокуоннайа суох эргитии туругун ырытыылара көрдөрбүтүнэн, нарколог бырааска учуокка турар дьон ахсаана аччаабыт.
Сылгыны, сүөһүнү уорууга быйыл 1 буруй бэлиэтэммит, ирдэбил үлэ ыыталлар. Нэһилиэнньэттэн сүтүктээхтэрин туһунан сайабылыанньа киирбэтэх. Сайыҥҥы өттүгэр, урукку курдук пост турара көҥүллэммэтинэн, хайысхаларын, кэрийэр туочукаларын, миэстэлэрин уларыта сылдьан, айылҕа харыстабылын инспекциятын, ойуур хаһаайыстыбатын, олохтоох дьаһалталары кытта кыттыһан холбоһуктаах рейдэлэри оҥороллор. Бу сыл 10 ыйын түмүгүнэн буруйу арыйыы 84 % тэҥнэспит, үлэ салҕанар.
Улууспутугар тутуу күүскэ ыытылларынан кэлии үлэһиттэри болҕомтоҕо ылан, миграционнай үлэни күүскэ ыыталлар. Бу хайысхаҕа улуус дьаһалтатын кытта ситимнээхтик үлэлииллэр, ол түмүгэр тендери ким кыайбытын, төһө үлэһиттээҕин көрө-билэ олороллор. Үлэ саҕаланна да, миэстэлэринэн кэрийэн, үлэһиттэри барыларын учуокка ылаллар. Билиҥҥи туругунан Нам улууһугар 86 кэлии үлэһит баар. Миграннар өттүлэриттэн буруй оҥоруута таһаарыллыбатах.
Михаил Кокарев, Нам улууһун ис дьыалаҕа отделын начальнига, полиция подполковнига:
-Бииргэ үлэлиир коллегаларбын, ис дьыала уорганнарын бэтэрээннэрин, үүнэн эрэр идэлээх бырааһынньыкпытынан бэйэм, Нам улууһун ис дьыала отделын аатыттан итиитик-истиҥник эҕэрдэлиибин! Сотрудниктарбар идэҕэ бэриниилээх буолууну, таһаарыылаах үлэни, бэтэрээннэрбитигэр чэгиэн туругу, биһиэхэ күүс-көмө буоларгыт, сүбэҕит-амаҕыт иһин дириҥ махталбын тиэрдэбин, этэҥҥэ сылдьыҥ, бука бары дьиэ кэргэҥҥитигэр үөрүүнү-көтүүнү, бары үтүөнү, дьолу-соргуну баҕарабын!
Касьян Олесов-Олук