Нам улууһун буулдьанан ытааччыларыгар аан маҥнайгы көһө сылдьар Федерация кубогын күрэхтэһиитэ буолан ааста. Ытааччылар “Манчаары оонньууларыгар” киирэр “Белка-ВПп” уонна “Белка-ПС” түһүмэхтэринэн ыппыттара этиллэр.
Култуура-спорт комплексыгар тохсунньу 18 күнүгэр буолбут күрэхтэһиитигэр Ленскэй нэһилиэк үс хамаандатыттан, Модуттан, 2 Хомустаахтан уонна Хатыҥ Арыыттан барыта 36 ытааччы сатабылын тупсара, холоно кэлбитэ. Уопсай түмүккэ, Ленскэй нэһилиэк эрэллээхтик бастаата, иккискэ Хатыҥ Арыы ытааччылара уонна үһүскэ Модут нэһилиэгэ тахсаллар.
“Буулдьанан ытааччыга бастатан туран, тулуур наада. Холобура, эмискэ хамсанан, ыксаан ыттаххына, эн үчүгэй түмүк ылыаҥ суоҕа”, – диир кылаабынай судьуйа, Нам улууһун чиэһин көмүскүүр Владимир Эверстов.
“Белка-ВПп” диэн ааттанар түһүмэххэ спортсмен сытан, олорон, туран эрэ аҕыйахта ытар. Бу эрчиллиигэ ытааччы туох да эбии чэпчэтиилэри туһаммакка, боростуой бинтиэпкэнэн, бэйэтин талаанынан ытар эбит. Бэлиэтээн эттэххэ, бу көрүҥ саҥардыы киирбитин Владимир Эверстов чопчулуур.
Оттон “Белка-ПС” эрчиллиигэ сыалы чопчу табарга чэпчэтиилэр бааллар. Холобура, үчүгэй түмүккэ сыалланар спортсмен профессиональнай бинтиэпкэнэн хамсаппат туһуттан илиититтэн саатыгар тирии хатаһы (ремень) холбуу иилинэрин, спортивнай формалаах, сытар олбох туһанарын кылаабынай судьуйа бигэргэтэр.
“Ытыы диэн саха киһитин хааныгар сүүрэр. Дэлэҕэ, Россия атын куораттарыгар сырыттахха сахабын диэтэххинэ “Белку в глаз” диэхтэрэ дуо!? Эппитим курдук, таһымнаах ытааччы икки ньыманы тутуһар. 50% – төһө тулуурдааҕар, талааннааҕар олоҕурар. 50% – хайдах бинтиэпкэни туһанарыттан тутулуктаах.
Нам улууһугар урукку сылларга, быһа холоон, 15 сыл анараа өттүгэр буулдьанан ытыы көрүҥүн улаханнык интэриэһиргээбэттэрин ааһан, билбэт да этилэр. Билигин нэһилиэктэр интэриэс уурдулар, сайыннарарга ылыстылар. Холобура, Модут, 2 Хомустаах спортсменнара ылсыбыттара көстөр. Буулдьанан ытыы нэһилиэккэ кыалларын Модут нэһилиэгэ күрэхтэһиигэ 3-с миэстэ буолан дакаастаата.
Бүгүҥҥү күҥҥэ, “Манчаары оонньууларыгар” диэри үгүс күрэхтэһии, дьарыктары, эрчиллиилэри оҥорорго былааннанабыт”, – диэн кэпсиир Владимир Семенович.
Харысхан Попов