Аппааны сэлиэнньэтигэр уопсайа 1238 быыбардааччы баар эбит буоллаҕына, күнүс 2 чаас түмүгүнэн уопсайа 826 киһи (66,7%), Граф Биэрэгэр уопсайа 424 быыбардааччыттан 282 киһи (66,5%), Кыһыл Дэриэбинэҕэ 168 быыбардааччыттан 128 киһи (76,1%), о.э. уопсайа нэһилиэк үрдүнэн 1830 быыбардааччыттан 1236 киһи (67,5%) куоластаабыт. УИК-тар бэрэссэдээтэллэрэ 70% аһардарбыт диэн санаалара күүстээх.
Эбиэт кэнниттэн кэтээн көрөөччүлэр 2 чааска дьуһуурустубаларын туттарсан, билигин Кирияна Корякина, Степанида Черноградская, Анжелика Алексеева олоруохтара. Эбиэт иннинэ СР общественнай палата представителлэрэ быыбардыыр учаастактарга сылдьан быыбар хаамыытын көрөн-истэн барбыттар. Кэтээн көрөөччүлэр иһитиннэриилэринэн быыбардыыр учаастактарга бастыкытын быыбардыыр ыччаттар кэлэн бырааптарын туһаммыттар. Ол курдук, Василиса Игнатьева, Илья Сивцев, Валентин Эверстов, Юрий Иванов кэлэн бэйэлэрин ытык иэстэрин толорбуттар. Оттон Аппааны олохтооҕо эдэр быыбардааччы Лев Смирников бу күн төрөөбүт күнүгэр кэлэн куоластаан, бэйэтигэр умнуллубат түгэни бэлэхтээбит. Граф Биэрэгин ытык кырдьаҕаһа 90 саастаах тыыл, үлэ бэтэрээнэ Сивцева Клавдия Кирилловна быыбарга кытынна.
Надежда Сивцева