Россияҕа Дьиэ кэргэн, Саха республикатыгар Оҕо саас, Нам улууһугар Оҕо спордун сылларыгар анаммыт былыргылыы хабылык түһүлгэтэ 10 дьиэ кэргэн хамаандатын түмтэ.
Тэрээһин Прокопий Ядрихинскай — Бэдьээлэ аатынан Олоҥхо дьиэтигэр дьиэ кэргэн ырыатын бары бииргэ ыллааһынынан саҕаланна.
Кыайыылаахтар мэтээл, грамота, спонсордартан (Олоҥхо дьиэтэ, «Эргимтэ» маҕаһыын) бэлэх туттулар. Чемпионнарынан I Хомустаахтан Надежда Прокопьева уола Алешалыын, иккис миэстэ — Модуттан Дария Ядрихинская сиэнэ Илоналыын, үһүс Хамаҕаттаттан Мария Винокурова сиэнэ Леналыын буоллулар.
Хамаандалар түмүктэрэ эгил-тэгил — биирдии, иккилии очкуонан араастаста. Салгыы дьарыктаннахтарына эбиллиэхтэрэ, сайдыахтара. Бары кыттыыны ылбыт дьиэ кэргэттэр туоһу суруктарынан, дьиэ кэргэн уонна ыччат политикатын, спорт уонна физическай культура управлениетын бириистэринэн бэлиэтэннилэр. Сынньалаҥҥа өҥнөөх хабылык, дьөһөгөй, шагай наадам (бурят оонньуута) оонньонно.
Хабылык түһүлгэтэ минньигэс торт амсайыынан түмүктэннэ.
Маргарита Охлопкова