Бүгүн улууспут киинигэр М.К. Аммосов аатынан култуура Дыбарыаһыгар 2024 сыл Арассыыйаҕа Дьиэ кэргэн, Саха Сиригэр Оҕо саас, Нам улууһугар Оҕо спордун сылларын арыйар үөрүүлээх тэрээһин И.С. Гаврильев аатынан Нам 1N-дээх орто оскуолатын 3 “б” кылааһын оҕолорун хорун толоруутугар (кыл.сал. М.Д. Рожина) «Моя семья» ырыанан саҕаланна.
Бу дьоро күҥҥэ дьоһун, холобур буолар олохтоох дьиэ кэргэттэри — 50 сыл бииргэ олорбут Ксения Филипповна уонна Семен Петрович Алексеевтары (Ленскэй нэһилиэк), Анна Афанасьевна уонна Михаил Григорьевич Кокоревтары (Хамаҕатта нэһилиэгэ), 55 сыл бииргэ олорбут Надежда Варламовна Сергучева уонна Александр Николаевич Федоровтары (Хамаҕатта нэһилиэгэ), 60 сыл бииргэ олорбут Мария Афанасьевна Павлова уонна Иван Николаевич Лукиновтар дьиэ кэргэттэрин (Хатырык нэһилиэгэ) чиэстээтилэр.
Ону сэргэ, 2023 с. бэчээттэммит «Саха сирин кыһыл көмүс ыаллара» («Золотые семьи Якутии») СӨ дьиэ кэргэнин нэһилиэстибэтин лиэтэпиһин 8-с таһаарыытыгар киирбит дьоһун олохтоох дьиэ кэргэттэри — Александра Даниловна, Василий Васильевич Игнатьевтары (Хатыҥ-Арыы нэһилиэгэ), Надежда Варламовна Сергучева уонна Александр Николаевич Федоров дьиэ кэргэнин (Хамаҕатта нэһилиэгэ), Ирина Егоровна, Степан Степанович Суздаловтары (Ленскэй нэһилиэгэ), Роза Тимофеевна уонна Иван Иванович Егоровтары (1 Хомустаах нэһилиэгэ), Варвара Касьяновна уонна Федор Иванович Новгородовтары (1 Хомустаах нэһилиэгэ), Матрена Алексеевна, Иннокентий Никитич Готовцевтарга (Ленскэй нэһилиэгэ) истиҥник эҕэрдэлээтилэр.
Саха сылаас холумтаннаах дьоһун-мааны дьиэ кэргэттэригэр үтүө-мааны тылларын улуус баһылыгын социальнай боппуруостарга солбуйааччы Юрий Дьяконов, ЗАГС Намнааҕы салаатын салайааччыта Марина Кокарева анаатылар, сэмэй бэлэхтэри туттардылар. Кинилэргэ кыттыһан нэһилиэктэр баһылыктара өйдөбүнньүк бэлэхтэри, үбүлүөйдээх дьиэ кэргэттэр оҕолоро-уруулара сибэкки дьөрбөлөрүн утары ууннулар.
Мустубуттарга ытык-мааны ыаллар ааттарыттан РСФСР үөрэҕириитин туйгуна, СӨ үтүөлээх учуутала, СӨ норуотун маастара Иннокентий Готовцев чөл олоҕу тутуһар, саҥаттан-саҥаны айарга дьулуһар, сайдыылаах ыччаттаах, саха саргытын салайсар бигэ тирэхтээх дьиэ кэргэн элбии турарыгар үтүө санаатын тиэртэ. Дьиэ кэргэн дуэттара — Эльвира, Артем Тюкяновтар уонна Алла, Петр Максимовтар иэйиилээх ырыалары толордулар.
Салгыы Юрий Вячеславович түөрт дьиэ кэргэҥҥэ — Сергей Аверьяновка, Нюргуяна Колмогороваҕа (Ленскэй нэһилиэк), Иван Александрович, Милена Михайловна Степановтарга (Бөтүҥ нэһилиэгэ), Ариан Афанасьевич, Кристина Сергеевна Татариновтарга (Хатырык нэhилиэгэ)эдэр ыаллары дьиэнэн хааччыйы федеральнай программатыгар киирбиттэрин бигэргэтэр туоһу суруктары, сэмэй бэлэхтэри туттардылар.
Нам улууһугар Оҕо спордун сыла саҕаламмытынан үөрэх управлениетын начальнигын солбуйааччы Егор Бочонин эҕэрдэтин тиэртэ, үөрэх, спорт сайдыытын сырдатта. Тэрээһин кыттыылаахтара улууспут оҕолоро былырыын Дьокуускай куоракка ыытыллыбыт, ситиһиилээхтик кыттыбыт спартакиадаларыгар анаан уһуллубут видеоролигы сэҥээрэ көрдүлэр. Онтон сылыктаатахха оҕолорбут бу сайын бэс ыйыгар улууспутугар ыытыллар «Спортивные якутяне» өрөспүүбүлүкэтээҕи оҕолор спартакиадаларыгар инники күөҥҥэ тахсалларыгар эрэл санаа үөскүүр. Өссө эрчиллиэхтэрэ, бэлэмнэниэхтэрэ турдаҕа.
Бу тэрээһини Нам 1 N-дээх орто оскуолатын 3 «б» кылааһын үөрэнээччилэрэ, «Ньургуһун» үҥкүү ансаамбылын кыра бөлөҕө үҥкүүнэн, ырыанан киэргэттилэр. Кэргэннии Алла, Петр Максимовтар дьоро тэрээһини иһирэхтик ыыттылар. Мустубуттар астынан, дуоһуйан тарҕастылар.
Касьян Олесов-Олук