Билиҥҥи бириэмэҕэ үлэлиир көлүөнэ дьон нэһилиэктэрин туһугар, дьон-сэргэ олоҕо тупсарыгар олорон, үлэлээн ааспыт биир дойдулаахтарын чиэстиир ытык иэстэрин умнубаттар. Ол курдук, 2 Хомустаах нэһилиэгин олохтооҕо, үлэ, Аҕа дойду Улуу сэриитин бэтэрээнэ, настаабынньык Афанасий Авксентьевич Осипов тохсунньу 31 күнүгэр 100 сааһын туоларын бэлиэтээн, кинини ахтан-санаан ааһыахтара.
Бу күн Е.П. Сивцев аатынан 2 Хомустаах орто оскуолатыгар Афанасий Авксентьевич Осипов-Мөөлөх олоҕун, үлэтин билиһиннэрэр кылаас чаастара тэриллиэхтэрэ.
Кини холкуоска, сопхуоска хонууга, пиэрмэҕэ биригэдьииринэн үтүө суобастаахтык үлэлээбитэ. Нэһилиэк олоҕор активнай көҕулээччи, тэрийээччи этэ. Нэһилиэк сэбиэтин депутатынан, профсоюз месткомун бэрэссэдээтэлинэн, үлэ сынньалаҥ лааҕырыгар настаабынньыгынан, уһун кэмнэргэ нэһилиэк кырдьаҕастарын сэбиэтин бастакы салайааччытынан үлэлээн ааспыта. «Японияны кыайыы иһин» мэтээллээх, Аҕа дойду Улуу сэриитин 2 истиэпэннээх уордьанаах.
Бэлиэ күн киэһэтигэр «Сэргэлээх» сынньалаҥ киин уораҕайыгар киниэхэ анаммыт киэҥ программалаах ахтыы киэһэтэ тэриллиэ.
Онтон тохсунньу 19 күнүгэр кини оҕолоро, ыччаттара уонна нэһилиэк бэтэрээннэрин сэбиэтин көҕүлээһиннэринэн, түөлбэлэр икки ардыларыгар воздушканан сыал ытыыга, дартска уонна эстафетаҕа спортивнай күрэх тэрилиннэ. Хас биирдии түөлбэ хамаандатын туруоран күрэхтэһиигэ кытынна, бэрт эрийсиилээх киирсиилэр буоллулар. Биирдиилээн көрүҥҥэ воздушканан ытыыга эр дьоҥҥо Григорий Протопопов, дьахталларга Анна Максимова, дартска эр дьоҥҥо Степан Протопопов, дьахталларга Зоя Лонгинова инники күөҥҥэ таҕыстылар. Оттон эстафетаҕа «Сатас» түөлбэ кыайда. Уопсай түмүккэ «Чагда» түөлбэ — 1 м., «Сатас» — 2 м., «Сайдам» — 3м., «Дьулуур» 4 м. ыллылар.
Кини аатыгар ыытыллыбыт аҕам саастаах дьоммутугар «Чэгиэн-чэбдик доруобуйа уонна спорт» күрэххэ бастаабыт түөлбэ хамаандатыгар оҕолоро туруорбут мэтээллэрэ уонна бары кыттыбыт күрэхтэһээччилэргэ грамоталар туттарылыннылар.
Лидия Пестрякова