Бүгүн Нам улууһун киинигэр Н.М. Рыкунов аатынан Нам улуустааҕы киин библиотека конференц-саалатыгар Россияҕа Дьиэ кэргэн, СӨ Оҕо саас сылларыгар аналлаах уонна саха литературата төрүттэммитэ 125 сылын көрсө, улуустарынан ыытыллар «Чолбон өй күрэһэ» оонньуу тэрилиннэ.
Бу оонньуу СӨ култуураҕа уонна духуобунай сайдыыга министиэристибэтин, СӨ «Сахабэчээт» судаарыстыбаннай автономнай тэрилтэтин уонна «Чолбон» сурунаал эрэдээксийэтин өйөбүллэринэн ыытыллар.
«Чолбон өй күрэһэ» оонньууга Нам улууһун Нам с., Хатыҥ Арыы, Хамаҕатта, 1 Хомустаах, Бөтүҥ, Хатырык, 2 Хомустаах, Түбэ нэһилиэктэриттэн 8 дьиэ кэргэн хамаандата кытынна. Өй күрэһин «Чолбон» сурунаал эрэдээксийэтин үлэһиттэрэ сүрүннээтилэр. Бас эрэдээктэр Гаврил Андросов оонньуу саҕаламмыт историятын сырдатан туран, иккиһин ыытыллар «Чолбон өй күрэһэ» оонньуу Эҥсиэли хочотуттан саҕаланан, аана аһыллыбытын уонна Намҥа иккистээн тэриллэрин санатта, ситиһиилэри баҕарда.
Оонньуу 4 түһүмэҕинэн барда: 1 түһүмэх – «Саха суругунан уус-уран литературатын төрүттээччилэр», 2 түһүмэх – «Репрессияламмыт суруйааччылар», 3 түһүмэх – «Улуу Кыайыыга сүгүрүйэн», 4 түһүмэх – «Аныгы литература».
Бу оонньууга нэһилиэктэр үстүү киһилээх хамаандалара билиилэрин туругутустулар. Түмүгэр Түбэ нэһилиэгиттэн Поповтар дьиэ кэргэнэ (23 б.) 1 миэстэни ылла, 2 миэстэҕэ Хатыҥ Арыыттан Матвеевтар дьиэ кэргэнэ (22 б.) таҕыста. 3 миэстэни Хамаҕаттаттан Шелковниковтар дьиэ кэргэнэ (19 б.) хааччынна. Кыайыылаах хамаандалар бары бэлиэ суругунан, кинигэнэн наҕараадаланнылар. Оттон кыттыбыт хамаандалар туоһу суруктарынан, сурунаалларынан бэлиэтэннилэр.
Түбэттэн кыайыылаах тахсыбыт Поповтар дьиэ кэргэн хамаандата Нам улууһун чиэһин көмүскүү бу ый бүтүүтэ Дьокуускай куоракка киирэн «Чолбон өй күрэһэ» оонньууга кыттыаҕа. Ол түмүгүнэн 4 бастыҥ дьиэ кэргэн хамаандата 2025 сыл тохсунньу 22 күнүгэр «Саха» НКИХ быһа эпииригэр «Бастыҥ ааҕар дьиэ кэргэн» ааты былдьаһыа, кыайыылаах тахсыбыт дьиэ кэргэн хамаандата сүрүн бирииһи тутуоҕа. Ол туһунан «Чолбон» сурунаал бас эрэдээктэрэ Гаврил Андросов иһитиннэрдэ.
Касьян Олесов-Олук