Быйылгы үбүлүөйдээх XXV-с өрөспүүбүлүкэтээҕи үөрэнээччилэр ортолоругар ыытыллар «Снежный барс» байыаннай-спортивнай оонньуу Чурапчы улууһугар тэрилиннэ. Оонньуу обургу оҕолор ортолоругар эт-сиин өттүнэн сайдалларыгар, олоххо куттал суох буолуу төрдүн, төрүт байыаннай үөрэҕи билсэллэригэр уонна патриотическай иитиигэ, чөл олоҕу тутуһууга туһуламмыт дириҥ суолталаах тэрээһин буолар.
Нам улууһун чиэһин Н.С. Охлопков аатынан Нам улуустааҕы гимназиятын 8-11 кылаастарыттан сүүмэрдэммит хамаанда көмүскүүр (1 оҕо Нам 2 №-дээх орто оскуолатыттан киирбит). Балаһыанньа быһыытынан хамаандаҕа 8 уол уонна 2 кыыс баар.
-Күрэхтэһиибит бүгүн саҕаланна. Барыта 13 хамаанда кыттар, олохтоохтор икки хамаанданы туруорбуттар. Эбиэккэ диэри күрэхтэһии аһыллыыта, парад буолла. Ол кэнниттэн хамаандалар стройунан хаамыыга, аптамааты ыһыыга-хомуйууга, «Ратные истории Отечества» күрэхтэстилэр. Оҕолорбут кыахтарын толору туһанан кииристилэр. Эбиэттэн киэһэ күүс-уох, эт-сиин бэлэмин тургутуу уонна байыаннай эстфетаҕа күрэхтэһии буолар, -диир хамаанда салайааччыта, ОБЖ учуутала Иван Сивцев. Оҕолору сарсын сыал ытыытыгар күрэхтэһии күүтэр, онтон түмүк тахсыыта буолуоҕа. Оҕолорбутугар байыаннай-спортивнай оонньууга ситиһиилээх кыттыыны баҕарабыт!
Касьян Олесов-Олук