Алтынньы 24 күнүгэр Нам улууһун Хамаҕатта олохтоох библиотекатыгар Россияҕа Дьиэ кэргэн, Саха сиригэр Оҕо саас, Нам улууһугар Оҕо спордун, Хамаҕатта нэһилиэгэр Доруобуйа сылларынан, Россияҕа Аҕа, Саха сиригэр Ийэ күннэрин чэрчитинэн библиотека уонна «Кэскилээнэ» эдэр ийэлэр түмсүүлэрэ «Толкуй. Тулуй. Тобул» диэн дьиэ кэргэҥҥэ анаан көхтөөх оонньуу ыыттыбыт.
Ефим Шапошников аатынан Хамаҕатта орто оскуолатын алын сүһүөх кылаастарыттан биэс дьиэ кэргэн кэлэн кыттыыны ыллылар. Ким саамай киэн билиилээҕин быһаарар 5 араас түһүмэхтээх викторина кэнниттэн, оҕолор бириэмэҕэ сахалыы пазлы хомуйан хамаандаларыгар быһаарыылаах бааллары эптилэр.
«Толкуй. Тулуй. Тобул» оонньуу түмүгүнэн 38 баалы ылан, муҥутуур кыайыылааҕынан Колесовтар дьиэ кэргэн буоллулар. Иккис миэстэҕэ 37 бааллаах – Давыдовтар, үһүс миэстэҕэ 36 бааллаах – Петровтар таҕыстылар. 34-түү бааллаах төрдүс миэстэни Зыряновтар уонна Ивановтар ыллылар. Көхтөөх кыттааччыларбытыгар барҕа махталбытын биллэрэбит, чуолаан куруутун бииргэ үлэлэһэр Е. Шапошников аатынан Хамаҕатта орто оскуолатын алын кылааһын учууталларыгар, кыттааччыларга бириис туруорбут олохтоох дьаһалтабытыгар, баһылыкка Евгений Ушницкайга, махталбытын тиэрдэбит.
Марина Корякина