Саха сиригэр “Ыалга олоҥхолооһун” бырайыак сыллата тэнийэр. СӨ Правительствотын председателин солбуйааччы Сергей Местников үтүө үгэһи салҕаан, дьиэ кэргэнинэн, аймах-уруу дьонунан түмсэннэр олоҥхо истиитин тэрийдилэр.
Олоҥхо – Саха омук киэн туттуута, үрдүктүк өрө тутар айымньыта! Ол курдук, Саха сирин салайааччыларыттан биирдэстэрэ Местников Сергей Васильевич “Чороон XXI” балаҕаныгар аймаҕынан мустаннар хос эһэлэрэ Андрей Гаврильевич (1883-1948 сс.) “Бардам Баабый” олоҥхотун истибиттэр. Местников Андрей Гаврильевич биллэр фольклорист, олоҥхоһут.
Ол курдук, Нам улууһун бастыҥ толорооччу ыччата Яна Нюргусова “Бардам Баабый” диэн олоҥхону түөрт чаас устата толорон истээччилэр сэҥээриилэрин ылыан ылбыт.
Нам улууhуттан төрүттээх Яна Нюргусова (Аргунова) олус талааннаах олоҥхоhут кыыс. Олоҥхо уус-уран баай тылын сүтэрбэккэ, хас биирдии уобараска сирэйдиин-харахтыын, куоластыын уларыйан көрөөччүгэ тиэрдибитин Местниковтар аймах бэлиэтээбиттэр.
Харысхан Попов