Нам улууһун киинэ Доҕордоһуу болуоссата тупсарыгар 2000-тан тахса куолас киирэн турар. Куоластааһын муус устар 30 күнүгэр түмүктэниэҕэ. Аҕыйах хонук иһигэр намнар эбии бэйэбит куоласпытын биэриэхпит – саҥардыллыбыт Доҕордоһуу болуоссакка үктэнэргэ.
Доҕордоһуу болуоссата саҥалыы тыын ыларыгар Лев Новгородов баһылыктаах 2 Хомустаах нэһилиэгэ өйүүрүн биллэрбитэ уонна куоластааһыҥҥа кыттыспыта. Ыаллыы олорор Хамаҕатта, Хатыҥ Арыы, 1 Хомустаах, Үөдэй эмиэ бэйэлэрин өйөбүллэрин биллэрбиттэрин улуус кылаабынай архитектора Анна-Мария Степанова этэр. Бу нэһилиэктэр биир санаанан, биир үлэнэн ситимнээхтэрин бэлиэтиибит. Кылаабынай архитектор былаан, саҥардыы, тупсарыы туһунан улуустааҕы гимназия, Намнааҕы 1-кы нүөмэрдээх оскуола үөрэнээччилэрин кытта көрсөн истиҥ кэпсэтии таһаарбыта.
“Бары төрөөбүт төрүт сирбитигэр тупсарыы, сайыннарыы ыытылларыгар кыһаллабыт. Санааны хас да гына хайыппакка Доҕордоһуу болуоссатыгар куоласпытын биэрэбит, биэрдибит, биэриэхпит”, – диир Анна-Мария Владимировна.
Куоластааһын кэмигэр 17 волонтер Намнааҕы 1-кы, 2-с нүөмэрдээх оскуолаларга, Почта России, Намнааҕы киин балыыһаҕа, Намнааҕы техникумҥа, Илья Винокуров аатынан Намнааҕы педколледжка болуоссат туһунан сырдатыы, кэпсэтии оҥорбуттара. Ону тэҥэ, уһуйааннарга, СТНГ, РЭС, НКТЭ курдук бөдөҥ тэрилтэлэргэ сылдьаннар Доҕордоһуу болуоссата тупсарын туһугар куоластыылларыгар ыҥырбыттара. Дьон үгүстүк сылдьар сирдэригэр атыы-эргиэн дьиэлэригэр уонна штабка олорон 3 волонтер үлэлэспитин ыччат лидерэ Майя Румянцева этэр.
“Үгүс куолаһы быыбар кэмигэр кулун тутар 15-17 күннэригэр уонна “Кыһыны атаарыы” норуот күүлэйигэр хомуйбуппут”, – диир Майя Андреевна.
14.gorodsreda.ru – куоластыырга бу ссыылканан киирэн бэйэҥ куоласкын биэр.
Харысхан Попов