Дьокуускайга улуустааҕы “Олимпик” спорт оскуола 7 иитиллээччитэ сэтинньи 28 күнүгэр дуобат улахан күрэхтэһиитигэр кыттыыны ылбыт.
Намнааҕы 1-кы нүөмэрдээх оскуола үөрэнээччитэ Матаннанов Айаал 42 оҕоттон 4 миэстэ буолан 3-с спортивнай разряд толорбут. Намнааҕы алын кылаас оскуолатын үөрэнээччитэ Гаврильева Василиса спорт маастарыгар кандидат буоларыгар 1 очукуо тиийбэтэх. Василиса бэйэтин бөлөҕөр 3 миэстэ буолары ситиспитин тренер Надежда Протопопова этэр.
Оттон сэтинньи 30 күнүгэр Дьокуускайга 6-с нүөмэрдээх Оҕо спорт оскуолатын аһаҕас турнирыгар “Олимпик” спорт оскуола 15 иитиллээччитэ оонньоото. Күрэхтэһиигэ барыта 200-тэн тахса оҕо кэлбитэ этиллэр.
Ол курдук, нуучча дуобатыгар буолбут күрэхтэһиигэ Намнааҕы 1-кы нүөмэрдээх оскуола үөрэнээччитэ Амбросьева Арина бэйэтин бөлөҕөр 30 оонньооччуттан эрэллээхтик кыһыл көмүс мэтээли ылбыт. “Олимпик” спорт оскуола эрэллэрэ бары 10 иһигэр киирэннэр киһи үөрэр көрдөрүүлэрин көрдөрбүттэрин тренердара Надежда Георгиевна этэр.
Нам улууһун дуобатчыт оҕолоро күрэхтэһиигэ кыттаннар, үгүстэ оонньооннор таһымнарын улаатыннардыннар, дойдуларыгар ситиһиини аҕаллыннар!
Харысхан Попов