Намнааҕы оҕо киин библиотекатыгар бүгүн “Дыгын оонньууларыгар” биэс төгүл кыттыыны ылбыт Нам улууһун бөҕөһө Антон Тойтонов ыалдьыттаата. Спорду интэриэһэргиир улаатан эрэр уолаттарга Антон Тойтонов спорт, үлэ, дьарык туһунан аһаҕас истиҥ кэпсэтии таһаарда.
“Дыгын оонньууларын” бөҕөһө Антон Тойтонов уолаттарга дьиэ кэргэнин, спорка хайдах кэлбитин, үгүс таһымнаах күрэхтэһиилэргэ туох ситиһиилэрдээҕин кэпсээн сырдатта. Санаттахха, Антон Тойтонов “Дыгын оонньууларыгар” бастакытын 2013 сыллаахха, онтон 2015-18 сс. кыттыбыта. Ситиһии дьиэ кэргэн өйөбүлүнэн кэлэрин хас да ааттаах спортсмен бэлиэтээн, этэн турардаах. Ол курдук, многоборье көрүҥүн өрө тутар Антон үөрэнээччилэргэ күүстээх өйөбүл кэргэнэ Евгения Тойтонова оҥорорун, буоларын этэр.
Антон Тойтонов бэйэтин кэмигэр “Дыгын оонньууларыгар” таас көтөҕүүтүгэр рекорд олохтообуттаах. Саха төрүт көрүҥэ халбар хапсаҕайга күүстээх боотурунан ааттанара. Оттон оскуолаҕа үөрэнэр сылларыгар, многоборье туһунан улаханнык санаабат бөҕөс атах оонньуутунан дьарыктаммытын, улахан кылаастарга футбол оонньуурун сөбүлүүрүн ахтан-санаан ааста. Антон Тойтонов бастакы тренерэ – Софронов Афанасий Михайлович буолар.
“Тренерым Афанасий Михайлович үгүс күрэхтэһиилэринэн илдьэ сылдьыбыта. Многоборьены Түбэҕэ ыытыллар Үрүҥ Уолаҥҥа күрэхтэһиэхпиттэн ыла интэриэһэргээн саҕалаабытым.
Ааттаах-суоллаах убайдарбыт Юрий Эверстов уонна Николай Дьяконов биир кэмҥэ дэгиттэр уолаттары түмэн дьарыктаабыттара. Онно 10 бөҕөс бэйэ-бэйэбитин кытта дьаныардаахтык дьарыктанан икки сыл иһигэр биллэрдик эбиллибиппит. Мантан сиэттэрэн санаабытым, многоборьеҕа кыра уолаттарга дьарыктанар кулууп үлэлэтиэххэ наада эбит диэн. Холобура, биһиги многоборьеҕа олохтоохтук оскуоланы бүтэрэн баран ылыстахпыт.
Маҥнай үлэ буларбар “Дыгын оонньууларын” призера Борис Сивцев күүс-көмө буолбутун этэр тоҕоостоох. Онтон баҕа санаабын толорон, сөбүлүүр үлэбэр баһаарынай сулууспаҕа үлэлии киирбитим.“Уолан” кулуупка 10-ан тахса уол оҕо дьарыктанар. Бэйэтигэр күүстээх, барытыгар дэгиттэр, инникилээх уол балаччалар диэн көрөбүн. Холобура, тутум эргиири олох сатаабат уол кэлэн билигин мүнүүтэҕэ 20-эн тахсата эргийэр. Оҕолор харахтара уоттаналларыгар аҥардас дьарыгынан эрэ буолбакка, бэйэҕинэн холобур буолуохха, ис санааларын арыйан, күрэхтэһиилэргэ илдьэ сылдьыахха наада дии саныыбын. Быйыл түөрт уолу “Дыгын оонньууларын” сүүмэрдиир күрэхтэһиигэ илдьэ киирэ сылдьыбытым.
Аһаҕастык эттэххэ, бүгүҥҥү күҥҥэ, Вячеслав Дьяконов кэнниттэн Намтан Дыгыҥҥа кыттар бөҕөс суох диир оруннаах. Ол иһин, уолаттары бэйэҕинэн санааларын бөҕөргөтөн, көтөҕөн илдьэ сылдьыахха наада.
Многоборьеҕа оҕо сылдьан атах оонньуутунан дьарыктаммыт буоламмын чэпчэкитик киирбитим. Атах оонньуутугар үчүгэй буоллаххына, ол аата сүүрүү, хапсаҕай көрүҥнэригэр үчүгэйдик киирсэҕин буоллаҕа. Билиҥҥи туругунан, атах оонньуута саамай күүстээх дии саныыбын”, – диэн кэпсиир Антон Тойтонов.
Харысхан Попов