Тохсунньу 29 күнүгэр Улуу Кыайыы 80 уонна Россияҕа Аҕа дойдуну көмүскээччи сылыгар анаан, «Эрчим» спорт саалатыгар улуустааҕы «Үрүҥ Уолан» күрэхтэһии буолан ааста.
«Күрэхпит уһуйаан «Алгыстаах алаһа» инновационнай үлэбит чэрчитинэн буолла. Сыала-соруга: уол оҕо олоҥхо бухатыырын курдук күүстээх-уохтаах, сымса, быһый буола улаатарыгар иитии. Күрэххэ 14 уол — «Куобах», «Мас тардыһыы», «Ох саа», «Наартаны ыстаныы», «Сүүрүү» көрүҥнэргэ күөн көрүстүлэр.
Түмүккэ «Үрүҥ Уолан – 2025» аатын 2 Хомустаах «Хомус» уһуйааныттан Старков Сайынар ылла, II миэстэни Семенов Саргын Намнааҕы «Солнышко», III миэстэни Иванов Данил Намнааҕы «Сулусчаан» уһуйаан иитиллээччилэрэ ыллылар.
Кыттыбыт уһуйааннарга махталбытын биллэрэбит. Күрэхпитин тэрийэргэ көмөлөспүт судьуйаларбытыгар – «Оҕо спордун киинин» үлэһиттэригэр, спонсордарбытыгар, Партизан нэһилиэгин тэрилтэлэрин салайааччыларыгар махталбытын тириэрдэбит.
«Үрүҥ Уолан» күрэхтэһии биһиги уһуйааммытыгар 8-с төгүлүн ыытыллыбыта. Оҕолор эт-хаан өттүнэн сайдалларыгар аналлаах күрэхтэһиини бастакынан Татьяна Афанасьева киллэрбитэ. Кып-кыра оҕолорго ымпыгын-чымпыгын тобулан, мындыр өйүн барытын ууран бу күрэхтэһиини тэрийэн кэлбитэ. Билигин Татьяна Афанасьева бочуоттаах сынньалаҥҥа олорор. Быйыл «Үрүҥ Уоланы» бастакытын улуус таһымнаах ыыттыбыт», — диэн Партизан нэһилиэгин «Кустук» уһуйаан сэбиэдиссэйэ Вера Петрова күрэхтэһии туһунан сырдатта.
Полина Скрябина, Партизан