Александр Степанович, Софья Никитична Жирковтар салайар ИП ГКФХ «Саҥа сүүрээн» 2024 сыл түмүгүнэн Нам улууһун тыа хаһаайыстыбатын салаатыгар «Лучший растениевод» анал аат хаһаайынынан буолтара.
Ол курдук, оҕуруот аһын көрүҥнэригэр: хортуоппуйу 1 гектартан — 120 центнери; хаппыыстаны — 310 центнери; моркуобу — 231 центнери; сүбүөкүлэни — 145,2 центнери хомуйдулар. Александрдаах Софья бу үрдүк ситиһиилэрин «Арыы Тиит» түөлбэ олохтоохторо уруйдуу көрсүбүппүт, тэҥҥэ үөрбүппүт.
Саха ыала бэйэ-бэйэҕэ көмөлөһөр, үллэстэр үтүө үгэстээх. Ону Александрдаах Софья Жирковтар дьиэ кэргэн холобурдарыгар көрөбүн.
Бу этиллэр хаһаайыстыба түөлбэ олоҕор өрүү кыттан араас көрүҥнээх көмө оҥороллор: арыт босхо куулунан моркуоп түҥэтэр, арыт араас бырааһынньыктарбытыгар куулунан хортуоска бириистээн үөрдэр. Ким доруобуйатын көннөрүнэригэр харчынан да кыттыһар. Бу сырыыга Жирковтар дьыл оройугар, тымныы, хараҥа бүрүүкээн ыарыы, тумуу үксээбит кэмигэр түөлбэлэрин олохтоохторугар биирдии куул хаппыыста түҥэттилэр. Ыал аайы бу сайыҥҥы күөх быйаҥтан тиксэн үөрүүбүт өссө үрдээтэ.
Бу курдук, таһаарыылаах үлэлээх дьиэ кэргэн хаһаайыстыбата үлэлээх-дьарыктаах буолуу үтүө холобура буола туруохтара диэн түөлбэ олохтоохторун уонна тус бэйэм ааппыттан махталбын тиэрдэбин.
Феврония Баишева, Хамаҕатта