Атырдьах ыйын 7-12 күннэригэр Забайкальскай кыраайга бадминтоҥҥа аан бастакы Бүтүн Россиятааҕы «Багуловый волан» турнир буолан ааспытын физическэй сайдыыга уонна патриотическай иитиигэ үөрэҕирии управлениетын сүрүн специалиһа Илона Обутова иһитиннэрэр.
Күрэхтэһиигэ барыта биэс регионтан уонна 10 муниципальнай тэриллииттэн 66 спортсмен кыттыыны ылбыт. Саха сириттэн Нам улууһун Намнааҕы 2-с нүөмэрдээх оскуола үөрэнээччилэрэ Парников Валера (9 кылаас) уонна Ширяева Аня (8 кыл.) кыттаннар бириистээх миэстэлэри ылбыттара этиллэр.
Ол курдук, булкаас оонньууга Ширяева Аня уонна Трушин Макар (Приморскай кыраай) үрүҥ көмүс призердарынан буолбуттар. Ону тэҥэ, Аня Ваулина Лиза диэн оонньооччуну кытта паараҕа кыттан турнир боруонса мэтээллэрин ылбыттар. Оттон Парников Валера Гарлачев Захары (Чита уобалаһа) паараҕа оонньооннор боруонса мэтээл хаһаайыттарынан ааттаммыттар.
Ситһиһиилээхтик кыттыбыт оҕолорбутун, төрөппүттэрин, кинилэри үөрэппит тренердэри, оҕолорго кыах биэрэр үөрэҕирии управлениетын, оскуола директорын эҕэрдэлиибит. Инникитин да кыайыылар кэлэ турдуннар!
Харысхан Попов