Нам улууһугар Александр Игнатьев кэриэһигэр көҥүл тустууга уолаттарга өрөспүүбүлүкэтээҕи аһаҕас турнир ыытылынна. Икки күн устата 8 хамаандаттан 2007-08 сыллаах төрүөх 93 тустуук уол бастыыр иһин күрэхтэстэ. Күрэхтэһии биэс сылга биирдэ буоларыгар быһаарыныы ылыллыбыт.
Александр Игнатьевы кытта алтыһан ааспыт дьон кэпсээниттэн иһиттэххэ, киһи эрэ барыта Александр Афанасьевич туһунан үтүө тылынан ахтар. Тус бэйэм Александр Игнатьев аатын иһиттэхпинэ, билэр киһим кини туһунан сөҕөн кэпсээбитин өйдүү биэрэбин. Онтон кэлин билэн олус соһуйбут, судургутук кэпсэппит, күүс-көмө буолбут киһитэ олох даҕаны үрдүк сололоох, дуоһунастаах, убаастабыллаах тойон буолан хаалар. Дойдутун туһугар элбэҕи оҥорбутун, үлэлээбитин улуустааҕы спорт управлениетын салайааччытын солбуйааччы Софронов Сергей Анатольевичтан истэҕин. Сергей Анатольевиһы кытта кэпсэттэххэ «Убайбыт үтүө киһи этэ, ис сүрэҕиттэн дойдутугар ыалдьара. Аны кэлэн кини курдук киһи төрүүрэ биллибэт» диэн Александр Игнатьев туһунан ахтар. Норуокка маннык судургу сыһыаннаах үрдүкү араҥаҕа үлэлиир сололоохтор аҕыйаҕа суохтар. Ол иһин, намнар Александр Игнатьев үтүө сыһыанын иҥэриниэхтээхпит, кини оҥорбут быһыыларын холобур оҥостуохтаахпыт.
Нам тустуук уолаттара 38 киилэҕэ кыайыылааҕынан Иванов Тимур буолла, иккис — Иванов Игорь. Оттон Новгородов Андрей уонна Петров Леонид 42 кг иккиэ боруонса мэтээл хаһаайыттара буоллулар. 45 кг Иванов Айсен кыайыылааҕынан таҕыста. Бу ыйааһыҥҥа Новгородов Айсен үһүс миэстэҕэ тахсан турда. Дьэ, улахан ыйааһыннарга намнар хайдахтарый? Өрөспүүбүлүкэ 80 кг үктүүр уолаттарыгар Семенов Тимур үрүҥ көмүс мэтээли кэттэ. Оттон 110 кг бөҕөстөргө Тимербаев Марат кыайыылаах, Прокопьев Павел үһүс буолары ситистилэр.
Көбүөр быһаарыытынан, биллэн турар, былыр былыргыттан тустуулаах улууһунан аатырбыт Чурапчы тустуута харыс үрдүккэ турара көһүннэ. Холобура, 60 киилэҕэ пьедесталга үс чурапчы тахсан турда. Ону тэҥэ, ыраах Сунтаартан кэлбит икки тустуук иккиэн мэтээллээх айаннаатылар. 71 кг Иванов Анатолий кыһыл көмүс уонна 80 кг Жирков Алехан боруонса мэтээллэр.
Сергей Софронов:
— Киэн туттар биир дойдулаахпыт Игнатьев Александр Афанасьевич кэриэһигэр көҥүл тустууга аан маҥнайгытын күрэхтэһии тэрийдибит. Спорт маастарыстыбатын үрдүкү оскуолатыгар (ШВСМ) үлэлээбит сылларыгар, Саха сирин тустуута сайдарыгар сүҥкэн кылаатын киллэрбитэ. Баара буоллар 60 сааһын туолуохтааҕа.
Бириистээх миэстэлэри ылбыттарга анал бириистэр туттарылыннылар. Саха сирин спордун министрин бастакы солбуйааччы Александр Бугаев; көҥүл тустууга кылаабынай тренер Вадим Семенов; волейболга кылаабынай тренер Айсен Жерготов; Саха сирин сүүмэрдэммит хамаандаларын бэлэмниир киин дириэктэрин солбуйааччы Нина Викторова; Хатырыктан Александр Игнатьев таайа Николай Сивцев дьиэ кэргэнэ; Тааттаттан Малышевтар; Олимпийскай эрэллэр училищетын дириэктэрэ Семен Чердонов; улуустааҕы НКТЭ салайааччыта Николай Игнатьев; улуустааҕы култуура управлениетын салайааччыта Семен Ядрихинскай; Ленскэй нэһилиэк баһылыга Петр Сокольников; Ньургун Тимофеев аат. өрөспүүбүлүкэтээҕи Олимпийскай эрэл спорт оскуолатын дириэктэрэ Василий Винокуров; улуустааҕы спорт управлениетын салайааччыта Павел Иванов; Намнааҕы Оҕо спорт оскуолатын дириэктэрэ Борис Егоров; улуустааҕы үөрэх управлениетын салайааччыта Мария Игнатьева; Александр Игнатьев олоҕун аргыһа Маргарита Игнатьева күүс-көмө буоллулар.
Турнир кыттааччыларыгар анал ааттар олохтоннулар. Одноклассниктара Андрей Архипов бэйэтин анал бирииһин Петров Богдаҥҥа; Евгений Ожихо Иванов Айсеҥҥа; Анатолий Мурунов Прокопьев Данилга; Николай Мохначевскай Семенов Тимурга туттардылар. Александр Игнатьев аат. ыытылар спартакиадаҕа бу уолаттар эмиэ күүс-көмө буолаллар. Василий Винокуров дьиэ кэргэнин, аймахтарын аатыттан бирииһи Евсеев Никитаҕа туттарда. Петр Сокольников анал бириһин Иванов Игорьга туттарда.
Бастакы, иккис миэстэлэри ылбыттарга анал бириистэр сэрэбиэй быһыытынан оонньоннулар. Ол курдук, Александр Бугаев туруорбут 5 тыһыынча солк. Нам тустууга Семенов Тимур ылла. Оттон кыайыылаахтарга Маргарита Игнатьева туруорбут 15 тыһ. солк. суумалаах сертификатын Дьокуускайтан Асанов Жакшылык ылла.
Нам улууһугар көҥүл тустууга өрөспүүбүлүкэтээҕи аһаҕас турниры Петр Юмшанов аатынан Намнааҕы Оҕо спорт оскуолата ыытта. Ону тэҥэ, тэрийсиигэ кыттыспыт коллегаларыгар, табаарыстарыгар, одноклассниктарыгар, күүс-көмө буолбуттарга улуустааҕы спорт управлениетын аатыттан махталбытын тиэрдэбин!
Харысхан Попов