Нам сэлиэнньэтигэр бүгүн оскуола оҕолоро хоккейга оонньоотулар. Ленскэй нэһилиэк баһылыга Петр Сокольников бирииһигэр «Золотая шайба» хоккей турнирыгар Үөдэйтэн, Намтан «Куонда Кириэс», «Нэлэгэр» хамаандалар бастыыр иһин күрэхтэстилэр.
Оҕолорго иккис төгүлүн ыытыллар хоккей күрэхтэһиитигэр кыайыылааҕынан «Куонда Кириэс» хамаандата тахсан «DNS» маҕаһыыҥҥа 10 000 солк. сертификатынан наҕараадаланнылар. Иккис миэстэлээх Нэлэгэр түөлбэ оҕолоро 7000 солк. сертификаты туттулар уонна үһүс буолбут Үөдэй оонньооччулара 5000 солк. сертификаты ыллылар.
Оонньууну кэтээн көрдөххө, уоннарыттан эрэ тахсыбыт Нэлэгэр кыра саастаах хоккеистара чаҕылхайдык оонньуулларын бэлиэтиэххэ сөп. Тренердэрэ энтузиаст Василий Бугаев Нэлэгэр түөлбэҕэ үлэлэтэр катогар уолаттар күүскэ дьарыктаналлар эбит. Холобура, 11 саастаах Лиханов Мирон бүгүҥҥү оонньууга субуруччу 2 шайбаны киллэрдэ.
Бүгүҥҥү күҥҥэ кыра саастаах уолаттар оонньууллара, ол аата, Нам улууһугар хоккейы өрө туталлара көстөр.
Турнир таһымнаах оонньооччулары бэйэтэ булаттаата. Ол курдук, «Бастыҥ вратарь» анал аатынан Үөдэйтэн Гаврильев Айаал, «Бастыҥ көмүскээччинэн» Нэлэгэртэн Гуляев Айдын, «Бастыҥ оонньооччунан»Нам сэлиэнньэтиттэн Данилов Ярик ааттаннылар. Маймаҕа баһылыга Александр Егоров туруорбут анал бирииһэ инникилээх оонньооччунан ааттаммыт Лиханов Мироҥҥа туттарылынна. Ону тэҥэ, уолаттар улуус хоккеистара туруорбут анал бириистэринэн наҕараадаланнылар.
Наммыт улууһун оҕолоро маннык оонньуулары, турнирдары өссө да тэрийэ, сайыннара туралларыгар баҕа санааларын тиэрдэллэр.
Харысхан Попов