Нам улууһун Кыһыл Дэриэбинэтин «Сайдыы» сынньалаҥ киинигэр «Далбар» дьахтар сүбэтин уонна «Сыдьаайа» иистэнньэҥнэр сыахтарын далбар хотуттара, салайааччы Дария Мальцева, истиҥ кэпсэтиигэ муһуннулар.
Көрсүһүүгэ Екатерина Тихонова күндү ыҥырыылаах ыалдьытынан буолла. Аппааны бүһүөлэгин олохтооҕо, элбэх оҕо күн-күбэй ийэтэ, тапталлаах эбээ Екатерина Андреевна Алданнааҕы медицинскэй колледж фельдшер салаатын үһүс куурсун устудьуона. Туйгун үөрэнээччи, группа, устудьуоннар олорор уопсай дьиэлэрин бастыҥ старостата, спорсменка, общественник от ыйын 17 күнүттэн балаҕан ыйын 18 күнүгэр диэри Ростов-на-Дону куоракка байыаннай госпитальга волонтерунан үлэлээбитин туһунан сырдатта.
Екатерина Андреевна оҕо эрдэҕиттэн эмп үлэһитэ буолар ыра санаата туолан эрэриттэн олуһун долгуйар, үөрэр. Алданнааҕы медицинскэй колледж Ростов-на-Дону куорат госпиталын кытта дуогабар түһэрсэн, колледж устудьуоннара: Нам, Бүлүү, Үөһээ Бүлүү улуустарыттан, Покровскай, Алдан куораттарыттан биэс кыыс буоланнар, от ыйыгар байыаннай госпитальга көмөҕө тиийбиттэр. Екатерина эдэр кыргыттары илдьэ, салайааччы быһыытынан барбыт.
«Биир куорпус иһигэр хас да отделениелаах. Биирдии отделениеҕа араас эчийиини ылбыт байыастар эмтэнэ киирэллэрэ. Күҥҥэ иккитэ: сарсыарда, киэһээ укуол туруорарбыт, араас процедуралары оҥорорго, бэрэбээскэҕэ көмөлөһөрбүт. Мин сарсыарда 6.30-тан киэһэ 11 чааска диэри үлэлиирим. Бастакы тиийбит кэммэр өрөбүлэ суох үлэлээбитим, кэлин субуота, баскыһыанньа күннэри өрөбүлүнэн анаабыттара. Госпитальга бэйэм баҕа өттүбүнэн тиийэн үлэлэлээбиппиттэн олуһун киэн туттабын. Ылыахтаах идэбэр биир бастыҥ уопут иҥэриннэҕим, араас мүччүргэннээх, суһал түгэннэргэ толлубакка, уолуйан туран хаалбакка, бү үлэлээбит икки ыйым миэхэ хаһан да умнубат түгэн, көмө буолар. Эһиил байыаннай госпитальга ыҥырдахтарына барарга бэлэммин» — диэн Екатерина Андреевна кэпсиир.
Екатерина Андреевнаҕа “Хатыҥ Арыы нэһилиэк” МТ сүрүннүүр специалиһа Надежда Сивцева баһылык махтал суругун, дьахтар сүбэтин аатыттан маҕаһыыҥҥа сертификат туттардылар. Итии үүттээх чэйдээх остуол тула олорон, истиҥник кэпсэтэн инники былааннарын сүбэлэстилэр.
Надежда Сивцева