Өрөбүл күннээҕи ааҕыылар: Мелодист Владимир Татаринов төрөөбүтэ 80 сааһыгар

Иэхэй-чуохай киэһэтэ

Саха киһитэ үөрдэҕинэ-көттөҕүнэ “иэхэй-чуохай” диир. Олунньу 18 күнүгэр Опера уонна балет театрыгар “Саха-концерт” солиһа, эстрада сулуһа, ааптар, мелодист, биһиги биир дойдулаахпыт Владимир Татаринов олоҕун 50 сааһыгар, айар үлэтин 25 сылыгар аналлаах дьоро киэһэтигэр сылдьыбыт дьон “Иэхэй-чуохай” аргыстанан дьиэлээтилэр. Кини айар үлэ омоон да, кэтит да, кэскиллээх да, ардыгар халтараан да суолунан 25 сыл устата айаннаан, бүгүҥҥү күҥҥэ киэҥ аартыкка дьигиһитэн кэлбитин үгүс ахсааннаах доҕотторо, атастара, биир идэлээхтэрэ, общественность киэҥник бэлиэтээтилэр.

“Ырыа – санаа көҥүлэ” айар киэһэҕэ РФ уонна СӨ үтүөлээх артыыһа Юрий Платонов, СӨ үтүөлээх артыыстара Владимир Заболоцкай, Алексей Павлов, эстрада артыыстара, араас сылларга ырыа конкурсун лауреаттара, 1974 с. “Чороон” ВИА солистара, “Иэхэй-чуохай” кантри-фолк, культура колледжын студеннарын эстраднай, “Кыталык” үҥкүү бөлөхтөрө кыттыыны ыллылар.

Театр киэҥ саалатыгар тобус-толору мустубут дьон Владимир Семенович айымньыларын бу үөрүүгэ кыттыһа кэлбит саха талааннаахтара үөрэ-көтө, үрдүк өрө көтөҕүллүүнэн толорбуттарын көрдүлэр. Үс чаас устата саала иһэ ытыс тыаһынан ньиргийэ, өрө дьигиһийэ олордо. Талааҥҥа сүгүрүйүү диэн, дьэ, бу буоллаҕа. Уолбут дьоҕурун ырыаҕа-тойукка эрэ буолбатаҕын эҕэрдэлээччилэр бэлиэтээтилэр. Володя сахалыы ырыаны гитаранан доҕуһуоллааһыны бастакынан киллэрбит эрэ киһи буолбатах. Кини сахалартан бастакы туризмҥа спортивнай ориентированиеҕа спорт маастарыгар кандидат.

Концеры салайан ыытааччылартан биирдэстэрэ Виталий Андросов Владимир Татаринов өссө өрдөөҕүтэ, олох оччотооҕу үөрүйэҕин утаран туран, саха эр киһитин бастакынан бытыктаабыт “үтүөлэрин” көр-күлүү ортотугар бэлиэтээтэ. Ол да иһин норуот киниэхэ “Бытык Болуодьа” диэн таптал ааты иҥэрдэҕэ. Бытык Болуодьаттан хаһан эрэ ыйыппыттар: “Эн бу тоҕо бытыктанаҕын?” – диэн. Онуоха: “А.П. Чехов бытыга суох эр киһи бытыктаах дьахтарга тэҥнээх” диэбитин санаппыт. Театр сценатыттан Владимир Татариновы “Саха Высоцкайа” диэн сөхтөрдүлэр. Ол улуу Высоцкай курдук аата Владимир Семенович, төрөөбүт кэмэ тохсунньуга буоларынан буолбатах. Саха ырыата гитаранан ылланан кутун-сүрүн сүтэрбэккэ, өссө эбии саҥа дорҕоон ылан киэҥ дуолга тахсар суолламмыта буолар. Гитаралаах ырыа айааччылар суолларын бастакынан тыырдаҕа.

Айар үлэ 25 сылын бэлиэтээһин түмүктээх буолла. В. Татаринов сүүрбэччэ ырыалара суруллубут компакт-диската таҕыста. Спонсора Евгений Прокопьев генеральнай директордаах “Бонус” фирма. Дьикти үчүгэй оҥоһуулаах “Дьоллоох буолуҥ!” диэн ырыаларын хомуурунньуга бэчээттэннэ. Таһаарыы спонсора — “Вилюй года” диэн акционернай компания, генеральнай директора СӨ народнай депутата Владимир Поскачин.

Саха омук ыччата үөрэххэ, билиигэ талаһарын тухары “Умнуллубат онус кылаас” ылланыа, Владимир Татаринов аата ааттаныа.

Гитара, Бытык, Ырыа киэҥ айан суолунан айар дьоҕур дьоруо соноҕоһун миинэн дуорааннаахтык айаннаатыннар.

И. КРИВОШАПКИН

“Эҥсиэли”, 1995 с., олунньу 25 к.

Читайте дальше