Сарсын, алтынньы 4 күнүгэр, “Экстра Синема” диэн технологиянан өрөспүүбүлүкэбит араас улуустарыгар 40 киинэ саалата аһыллыаҕа. Наммыт улууһугар Хамаҕатта, Нам, Модут уонна Хатырык нэһилиэктэригэр киинэ саалалара үлэлэрин саҕалыахтара, олохтоохтор саҥа киинэлэри улахан экраҥҥа көрөр буолуохтара. Үөрүүлээх түгэҥҥэ нэһилиэнньэ Михаил Лукачевский режиссердаах “Кыталыктаах кырдалым” диэн сахалыы киинэни көрүөхтэрэ.
Саха сиригэр «Экстра Синема» диэн оҥорон таһаарар-хомуйар сыах күҥҥэ 15 проекторы оҥорор кыахтаах. Маннык проектордарынан тыа сирин кулуубугар киинэни көрдөрүөххэ сөп, бу тэрил сыаната 1 мөлүйүөн солкуобайтан үрдээбэт. 40 киинэ саалата үлэлээтэҕинэ, кыра дэриэбинэлэргэ 70-тан тахса киһи улахан экраҥҥа киинэ көрөр кыахтанар.
“Экстра Синема” бырайыак 2022 сылтан үлэлиир. Билиҥҥи туругунан, өрөспүүбүлүкэҕэ 30 киинэ саалата үлэлии турар.
Майя Федорова