Саха сирин үөрэхтэрин тэрилтэлэрин икки ардыларыгар инновационнай бырайыактары олоххо киллэрэргэ СӨ Ил Дарханын Гранын ыларга ыытыллар куонкурус саҕаланна.
Өрөспүүбүлүкэ 18 улууһуттан үөрэх тэрилтэлэрэ хамыыһыйа иннигэр 66 бырайыагы билиһиннэриэхтэрэ, көмүскүөхтэрэ.
Нам улууһугар өрөспүүбүлүкэтээҕи киэҥ ис хоһоонноох конкурска үс күн устата Хамаҕаттаҕа Ефим Шапошников аатынан орто оскуолатыгар Мииринэй, Үөһээ Дьааҥы, Сунтаар, Дьокуускай, Нам, Өлөөн, Ньурба, Бүлүү, Мэҥэ Хаҥалас, Кэбээйи, Чурапчы, Алдан, Өлүөхүмэ, Нерюнгри, Горнай, Таатта, Эдьигээн, Уус Алдан оскуолаларыттан, уһуйааннарыттан кэлбит 140-ча педагог кыттыыны ыларын иһитиннэрдилэр.
Таһымнаах конкурс үөрүүлээх аһыллыытыгар Нам улууһун баһылыгын солбуйааччы Юрий Дьяконов, улуустааҕы үөрэх управлениетын салайааччытын солбуйааччы Светлана Поротова ыалдьыттары эҕэрдэлээтилэр, ситиһиини баҕардылар.
СӨ Ил Дарханын Гранын конкурсун бастакы күнүгэр бырайыактары билиһиннэрээччилэр олохтоохтук бэлэмнэниэхтэрэ. Үөрэх тэрилтэлэрин үлэһиттэригэр быһаарыылаах, долгутуулаах күн сарсын үүнүөҕэ.
Саха сирин оскуолаларыгар, уһуйааннарыгар буолар конкурс быйыл үбүлүөйдээх 25 төгүлүн олохтонон ыытылларын үөрэҕи сайыннарыы уонна квалификацияны үрдэтии институтун дириэктэрин солбуйааччы Николай Бугаев этэр. Саха сирин баһылыгын Граныгар ыытыллар конкурска Николай Иннокентьевич эксперт быһыытынан үлэлиэҕэ.
Үөрэх эйгэтин үлэһиттэрэ бириэмэлэрин аттаран П.И. Сивцев аатынан Намнааҕы история уонна этнография, Хатыҥ Арыыга Илья Винокуров аатынан Историяны уонна кыраайы үөрэтэр, Никольскайга И.С. Шарапов аатынан сири туһаныы түмэллэрин көрүөхтэрэ-истиэхтэрэ.
Харысхан Попов