Бары билэрбит курдук, Нам улууһугар 4 нэһилиэк өрүс уҥуор тайаан сытар. Билигин өрүһүнэн сырыы суох кэмигэр хайдах дьаһанан олороллорун кэккэ нэһилиэктэр баһылыктарын кытары билистибит.
Көбөкөн
Кыыдааннаах кыһыны туоруурга оттук кэмин сүрүн болҕомтоҕо ылаллар. Ол курдук, саас өрүс суола сабыллыар диэри хочуолунайдары отторго «Намкоммунтеплоэнерго» АО чоҕу таспыт. Хас сыл аайы өрүс уҥуор нэһилиэктэр «Саханефтегазсбыт» АО тэрилтэни кытары дуогабардаһан уматыгынан хааччыналлар. Ол курдук, быйыл уопсайа 10 т сакаастаабыттар. Ааспыт сылларга 25 лиитэрэлээх таараны сакаастаабыт эбит буоллахтарына, бу сылга 40 лиитэрэлээхтэри аҕалтарбыттар. Онтон 1 т 600-һэ бензин, 8 т 400-һэ сэлээркэ. Олохтоохторго анаан нэдиэлэҕэ иккитэ атыылыллар эбит.
Сүөһүлэрин, сылгыларын кыстыгы туоратарга отторун былааннарын толорон эрэх-турах санаалаахтар. Эбии аһылыкка анаан 5 т уотурба, 1 т эбиэс баар.
Ыраах баар нэһилиэктэргэ килиэп сүрүн кыһалҕа буолааччы. Бу нэһилиэккэ оннугу көрсүбэттэр. Ия Колесова килиэп буһаран таһааран күн аайы атыылыыр. Бурдугун өрүс суола сабыллыан иннинэ хаһааммыт, онно эбии соторутааҕыта Бэстээхтэн аҕалбыт. Балыыһаҕа сытан эмтэнээччилэргэ анаан эмп-томп барыта баар.
Олохтоохтор суолбут суох диэн таах олорон хаалбаттар. Культура үлэһиттэрэ бэлиэ күннэри, бырааһынньыктары сэргэхтик тэрийэллэр, күргүөмүнэн субуотунньуктарга тахсаллар. Ол курдук, түөрт түөлбэ саҥа дьылга диэри 7 араас көрүҥҥэ күрэҕин былааннаабыттар. Ийэ, Аҕа күннэрин бэлиэтээн «Уйгуну түстүүр» сынньалаҥ биэчэр буолан ааспыт. Түөлбэлэр икки ардыларыгар «Косплей — 2023» куонкурсун тэрийбиттэр. Норуоттар сомоҕолоһууларын күнүн бэлиэтиэхтэрэ.
Нэһилиэк эр дьоно уонна дьаһалта үлэһиттэрэ уопсайа 19 ыалга муус ылан биэрбиттэр. Ол иһигэр 5 — байыаннай дьайыыга сылдьар буойуннар дьиэ кэргэттэригэр, 3 тыыл бэтэрээнигэр, 4 сэрии кэмин оҕолоругар, 7 үлэлээбэт кырдьаҕастарга.
Арбын
Арбыннар икки хочуолунайга уопсайа 1896 т чоҕунан хааччыллан олороллор. Нэһилиэнньэҕэ анаан 800 л бензин, 1 т сэлээркэ баар. Нэһилиэк дьоно-сэргэтэ уопсайа 390 төбө сүөһү, 200 төбө сылгы иитэр. Отторун былааннарын толорон кыстыгы этэҥҥэ туоруур санаалаахтар. Хаһаайыстыбалаахтар сакаастарынан 4-түү туонна уотурбаны уонна эбиэһи аҕалтарбыттар. Быйыл кэпэрэтиип тэрийэннэр 6 ыал чилиэнинэн киирбиттэр. Онон хотоҥҥо 40 сүөһүнү эдэр ыал көрөр-истэр.
Маҕаһыыҥҥа бородуукта арааһа дэлэйин этэллэр. Бэстээххэ суол быстыбат буолан онтон аҕалаллар эбит. ФАП-ка ыксаллаах быһыыга-майгыгы туттуллар, тумууга аналлаах эмтэр, хамсык ыарыыны быһаарар тестэр бааллар.
Нэһилиэк дьоно-сэргэтэ уопсастыбаннай үлэҕэ, субуотунньуктарга көхтөөхтүк кытталлар. Ол курдук, бүгүн оскуола, оҕо саадын, «НКТЭ» АО уонна дьаһалта үлэһиттэрэ байыаннай дьайыыга сылдьар буойун дьиэ кэргэнигэр идэһэ астыырга күүс-көмө буоллулар.
Бу курдук икки нэһилиэк олоҕо күөстүү оргуйар.
Семен Аргунов