Сэтинньи 30 күнүгэр фольклор декадатын түмүктүүр дьоро киэһэ, Таастаах нэһилиэгин күнүгэр ананан, М.В. Петрова аатынан оскуолаҕа оҕо түмсүүтүн салайар учуутал Аксиния Татаринова салайыытынан үрдүк таһымнаахтык буолан ааста.
Декада чэрчитинэн кылаас салайааччылара оҕолорго саха уус-уран айымньыларын үөрэтэн, викториналарга кытыннаран, «Олоҥхо диктанын» суруйтаран онтон да атын араас тэрээһиннэргэ көхтөөхтүк кытыннардылар.
Түмүктүүр дьоро киэһэнэн, быйыл саҥа аанын арыйбыт култуура-спорт киинигэр эҕэрдэ кэнсиэр буолла.
Оскуола үөрэнээччилэрэ төрөппүттэрэ тикпит саҥа таҥастарын кэтэн нэһилиэк олохтоохторугар үҥкүүлээн, хомус тардан, чабырҕах ааҕан, норуот ырыаларын толорон, саха инструменнарыгар оонньоон сэргэх киэһэни бэлэхтээтилэр. Кэнсиэри оскуола үлэһиттэрэ «Үчүгэйиэн алааспар» норуот ырыатынан түмүктээтилэр.
Т.М. Аргунова, Таастаах