Нам улууһугар 2024 сыллааҕы улуус баһылыгын отчуота саҕаланна.
Тыа хаһаайыстыбатыгар улуус баһылыгын солбуйааччы Филипп Николаев салайар 3-с бөлөҕө Фрунзе уонна Түбэ олохтоохторо тугу туруорсалларын истиэҕэ.
Фрунзе олохтоохторо саамай тыын ыйытыылара — суол уонна сибээс. Быйыл суолга хаһааҥҥытааҕар да ыарахаттары көрсүбүттэр. Айаҥҥа бигэ маршруттаах такси көрүллэригэр санааларын этэллэр. Аны сибээскэ, интернеккэ харгыстар үөскээннэр нэһилиэк библиотека үлэһитэ суох хаалбыта чопчуланар.
Отчуоту истээччилэргэ Улуу Кыайыы 80 сылыгар сэрии сылларын оҕолоругар биирдэ бэриллэр 5 тыһ. солк. суума харчы уонна юбилейнай мэтээл көрүллүөхтээҕин социальнай харалта үлэһитэ Прасковья Аммосова иһитиннэрдэ. Оттон улуус өттүттэн көмө көрүллэригэр үлэлэр ыытылла тураллара этилиннэ.
Нэһилиэккэ суол уонна сибээс боппуруоһа сытыытык турарын хас да киһи эттэ. Бу курдук салҕанан бардаҕына көһүү саҕаланыаҕа дииллэр.
Улуус олохтоох дьаһалтата киирбит ыйытыыларга сөптөөх быһаарыы ылыллыаҕар, үлэ ыытыллыаҕар фрунзелар эрэнэллэр.
Отчуоту сыаналааһынтан икки киһи туттунна.
«Туттуммут уонна туттумматах диэн суох буоларын туһугар үлэлиэххэ», — диэн Филипп Васильевич отчуоту түмүктээтэ.
Харысхан Попов