Бүгүн «Нам улууһа» МТ 2023 сыллааҕы отчуотун иһитиннэрэр улуус баһылыгын э.т. Анатолий Павлов салайааччылаах 1-кы бөлөх Фрунзе нэһилиэгэр сырытта.
Улуус дьаһалтатын ааспыт 2023 сыллааҕы отчуотун нэһилиэк 20 олохтооҕо иһиттэ.
Улуус кииниттэн ыраах нэһилиэктэргэ аптека аһыллан үлэлиир, онон бу ыйытыы сүрүн боппуруос буолла. Өрүс уҥуор нэһилиэктэр Көбөкөҥҥө аһылларын туруорсаллар. Киин балыыһаҕа харах бырааһа тоҕо суоҕун туоһуластылар.Нэһилиэк ФАП-гар өрөмүөн ыытылларын, саҥа миэбэл уонна туттар тэрил баар буоларын улуус кылаабынай бырааһа иһитиннэрдэ.
Тыа хаһаайыстыбатыгар, кэтэх хаһаайыстыбалаах ынах төбөтүгэр көрүллэр субсидияны ылбыттар тоҕо кыра сыанаҕа үүтү туталларын, биэҕэ көрүллэр субсидия ирдэбилин, бааһынай хаһаайыстыба базатыгар уот ситимин тардыытын, хаһаайыстыба тэринэргэ социальнай хантараак туһунан, өртөөһүнү арыыга ыытары сөргүтүүнү ыйыттылар. Итиэннэ ынаҕы буоһатыы үлэтэ мөлтөөн төрүөх аҕыйаан эрэрин эттилэр.
Байыаннай дьайыыга сылдьар буойуттарбытыгар РФ оборуонатыттан төһө хааччыйалларын, оскуола-садка капитальнай өрөмүөн хаһан ыытылларын сурастылар.
Сынньалаҥ киин директора Анна Потапова материальнай-техническэй хааччыллыыны, граннарга кыттыыга куратор сыһыаралларын туруоруста.
Саҥа тутуллубут дьиэлэргэ киин ититии ситимин тардыы усулуобуйатын ыйыттылар.
Эдэр ыал хаһаайыстыба тэринэллэригэр уонна инникитин олохтоохтор сүөһүлэрин көрөллөрүгэр кооператив тэринэллэригэр күүс-көмө, сүбэ-ама, ыйыы-кэрдии буолалларыгар көрдөһүү быһыытынан эттилэр.
Фрунзе нэһилиэгин олохтоохторо улууска үгүс таһымнаах үлэ ыыталларын этэн туран, улуус дьаһалтатын ааспыт сыллааҕы үлэтин биһирииллэрин биллэрдилэр.
Отчуот кэнниттэн олохтоохтор туһааннаах специалистартан, салайааччылартан өссө төгүл дириҥник токкоолоһон санааларын ситтилэр.
Семен Аргунов