Халлаан сылыйан, күн уота сыдьаайа оонньоон, оҕо аймах таһырдьа тахсан, үөрэ-көтө тоҕуоруһа мустан оонньуура үксээтэ. Ол курдук, муус устар 3 күнүгэр Аппааны сэлиэнньэтин “Мавра” күөлүгэр И.Е. Винокуров аатынан Хатыҥ Арыы орто оскуолатын уолаттарыгар анаан “Хоккей в валенках” диэн бэрт сэргэх, сонун тэрээһин буолан ааспытын туһунан диэриэктэри иитэр үлэҕэ солбуйаачы Валентина Максимова иһитиннэрдэ.
Күрэх ааптара уонна тэрийээччитэ И.Е. Винокуров аатынан Хатыҥ Арыы орто оскуолатын педагога Лукин Андрей Валерьевич буолар. Хоккей күрэҕэр 7-11 кылаастартан 40 уол, уопсайа 8 хамаанда кытынна. Хамаандаҕа биэстии буолан күрэхтэстилэр. Күрэххэ нэһилиэк спорт уонна ыччат отдела (дир. Бурнашев Е.К.) хоккей клюшкатынан уонна тэрээһинигэр көмөлөстө. Судействоҕа оскуолаттан Айсен Назаров уонна Андрей Лукин үлэлээтилэр. Күөлгэ бу күн учууталлар, төрөппүттэр, оҕолор бэйэлэрин хамаандаларыгар көхтөөхтүк ыалдьаннар, уолаттарга күүс-уох эптилэр.
Тыҥааһыннаах киирсии түмүгүнэн 1 миэстэни — 9 «б» кылаас (кыл. сал. Матвеева А.А.), 2 миэстэни – 10 кылаас (кыл. сал. Винокурова Т.Е.), 3 миэстэни11 кылаас (кыл. сал. Лукина А.И. ) ыллылар уонна грамотанан, мэтээлинэн наҕараадаланылар.
Хатыҥ Арыы нэһилиэгэр быйыл Доруобуйа уонна физическэй култуура сылын чэрчитинэн ыытыллар араас тэрээһиннэргэ ыччаттар көхтөөхтүк кыттыылара бэлиэтэнэр.
Надежда Сивцева