Нам улууһугар сахалыы остуол оонньуутун улуустааҕы II түһүмэҕин чемпионата Никольскайга 10 хамаанданы түмтэ. Чемпионат үөрүүлээх аһыллыытыгар Светлана Кудрина ырыаларын “Намыына” норуот коллектива толордо.
Хабылык, хаамыска II түһүмэҕин уратыта, 5-тээх хаамысканы тоҥсуйан оонньооһун буолла. Бу иннинэ, биирдиилээн хаамыскаһыт оонньуур эбит буоллаҕына, бу сырыыга ирдэбил быһыытынан, бука бары холоннулар.
Хамаанданан түмүккэ, бастакы миэстэни Ленскэй нэһилиэк ситистэ, иккис миэстэ – Хамаҕатта, үһүс миэстэ – l Хомустаах. Бөлөхтөргө чемпионнар, призердар ураты оҥоһуктаах мэтээллэринэн, грамотанан бэлиэтэннилэр. Кыайыылаах хамаандаларга СӨ туйгуна, мелодист Светлана Кудрина аймахтарын ааттарыттан Клавдия Кривошапкина харчынан бириис туттарда. Аймахтар сахалыы остуол оонньуутун өйүүллэр, бу спорт көрүҥэ сайдарыгар кылааттарын киллэрэллэрэ хайҕаллаах.
Түмүк тахсар кэмигэр, улуустааҕы скандинавскай хаамыы федерациятын аатыттан Дмитрий Елисеев, Розалия Черкашина спортсменнарга араас бириистээх оонньуулары оонньотон сынньаттылар, сэргэхситтилэр.
Чемпионат тэрээһинигэр, ыытыытыгар кыттыбыт бар дьоммутугар, спорт управлениетыгар, “Никольскай” МТ, Култуура дьиэтигэр, “Намыына” норуот коллективка, Светлана Кудрина аймахтарыгар, судьуйаларга, спортсменнарга барҕа махтал.
Бэс ыйыгар чемпионат III-с түһүмэҕэр күүтэбит.
Маргарита Охлопкова